• ×
الجمعة 26 فبراير 2021 | 02-26-2021
محمد كامل سعيد

المريخ ليس بكري المدينة يا عالم..!!

محمد كامل سعيد

 36  0  4067
محمد كامل سعيد
* تابعنا مباراة أمس بين المريخ والهلال واحسسنا بحجم الخدعة التي صور لنا فيها ان المريخ وصل الى أعلى درجات الجاهزية.. ولعل (الانفعالات التلقائية) التي حدتث من الجماهير خلال الشوط الأول اثبتت تلك الحقيقة..!!

* صوّر البعض ان المريخ صار هو بكري المدينة مع ان المريخ أكبر من بكري وأي لاعب مهما كان اسمه او بلغت شهرته..!!

* لقد تفرد الهلال وانفرد بالسيطرة على الكرة في معظم فترات مباراة الأمس وكان الأعلى كعباً والأوفر فرصاً.. وجاء هدف علاء ليحفظ ماء الوجه في الشوط الأول..!!

* ظهر الهلال بتفاهم وتناسق عدا بعض النشاذ في اداء سيدي بيه وبشة لدرجة يمكننا القول معها ان الازرق لعب ناقصاً طوال الشوط الأول وبالمقابل لم نلمح اي لمسة تكتيكية او خطة متفق عليها من جانب المريخ..!!

* اعتمد المريخ على الارتجال والمهارات الفريدة فكان من الطبيعي ان يتألق راجي وينفعل بلة جابر ويتفلت علي جعفر ويغيب أوغستين الذي صدّع به المطبلاتية رأسنا عن مهارته وموهبته وعملياً لم نجد غير السقوط المتواصل للاعب على الارض..!!

* حتى الهدف الرائع الذي سجله علاء الدين جاء من تسديدة لا ننكر روعتها من مسافة بعيدة في غياب اللعبة المتفق عليها او التمريرة او الجملة.. وكان بالامكان ان تذهب الى المدرجات شأن شأن بقية المحاولات..!!

* انفعلت جماهير المريخ بعدما انكشفت امامها حقيقة انها جاءت الى المدرجات لتشاهد بكري المدينة وهو يدك حصون الهلال لا لشئ سوى لأجل ممارسة المكاواة مع الهلالاب في اشارة عميقة لحجم الوهم الذي ابتعاعوه..!!

* لقد وجد بكري فرصة ذهبية من كرة اخطأ فيها دفاع الهلال وواجه الحارس مكسيم لكنه (توهم) انه لاعب صاحب مهارة في المراوغة فحاول الرجوع بأتير توماس فضاعت منه الفرصة الذهبية التي جاءته هدية..!!

* بلة جابر وعلي جعفر خرجا غير مرة من تركيزهما ومارسا الضرب والرفس دون وضع اي اعتبار لعظم المنافسة او الضيوف الذين حضروا بالاستاد وكادا ان يتسببا في اشعال الموقف في اشارة اكدت افلاسهما..!!

* نعم لقد غيّر البلجيكي باتريك من شكل الهلال في الشوط الثاني بعدما استعاد بالنجم الصاعد الواعد وليد علاء الدين وزميله فيصل موسى بالتحديد ولعل هذا الثنائي وكلما ابدع مع الهلال سيذكرنا مأساة الادارة في المريخ..!!

* انطلق وليد وفيصل وقاد انقلاباً في وضعية المباراة وحولا كفة السيطرة لصالح الهلال وبدأ سيناريو التعادل من قدم فيصل وترجم كيبي الكرة المعكوسة من نزار بطريقة مقصية رائعة تفرج عليها سالم..!!

* الحقيقة التي يجب على جماهير المريخ ادراكها ان المريخ ليس هو بكري المدينة او كما يسعى ويجتهد بعض المطبلاتية لتثبيت تلك الكذبة ربما طمعاً منهم لتبجيل وتكبير كوم الرئيس الذي قام بتسجيل اللاعب..!!

* تخريمة اولى: واذا نظرنا الى موضوع التعاقد مع بكري وحاولنا تمجيد الرئيس المريخي بتلك الصفقة يجب علينا ان لا ننسى تفريطه ـ اي الرئيس ـ في وليد علاء الدين وفيصل موسى..!!

* تخريمة ثانية: ثبت ان الهلال اقترب من اكمال الجاهزية في الاعداد للموسم التنافسي الجديد، وبالمقابل تأكدنا ان المريخ لا يزال بحاجة للمزيد من التجارب والبدائل..!!

* تخريمة ثالثة: نقول ذلك وفي بالنا التجارب الفاشلة التي خاضها الفريق الاحمر في القاهرة والدوحة والخلافات المريرة التي حدثت وستحدث في قادم الايام..!!
امسح للحصول على الرابط
بواسطة : محمد كامل سعيد
 36  0
التعليقات ( 36 )
الترتيب بـ
الأحدث
الأقدم
الملائم
  • #2
    أدى التحية للزعيم 01-26-2015 03:0
    أولا من لا يشكر الناس لا يشكر الله ثانيا لا تبخسوا الناس أشيائهم وأخير أما أنك نظرك ضعيف وأنا متبرع ليك بنظارة وعدسات طبية (Photochromic lenses) الأيميل بطرف كفر ووتر
  • #3
    ادريس 01-25-2015 05:0
    انت انسان لا ترى شيئاً جميلا في المريخ لأنه حيى كتاب الهلال اكدوا بان المريخ كان الافضل والي يستحق الفوز واتاتي انت تنفي كل شئ كانك انت الوحيد الذي شاه المباراة.... ياخي خليك منصف مرة في حياتك
  • #4
    حسن كوستي 01-25-2015 05:0
    انا هلالابي لكن النصيحه امس المريخ اتغير تماما وقدم كره جميلة مع القليل من التركيز
  • #5
    Ali yas 01-25-2015 02:0
    معظم هذه التعلقات فاشلة وضعيفة فقط الهوى ، وتحليل هذا الرجل تعرفوا صحته عندما الفأس يقع في الرأس ؟ ما شفتم ضرب بلة جابر ونفخته في البلجيكي كورة كلها شلاليت وكسير وضرب . أ . محمد كامــــــــــــــــــــــل شكراً على هذا التحليل القوي . يارب أرحم العباد والبلاد .
  • #6
    الضكر 01-25-2015 01:0
    لا نريد ان نتهم الناس بدون ادلة ولكن نقول مباراة امس لعب المريخ شوطها الأول بمستوى رفيع وفي الشوط الثاني قل العطاء في ربع الساعة الأولى التي احرز فيها الهلال هدف التعادل من خطأ دفاعي يسأل عنه علي جعفر ولكن سرعان ماعاد المريخ وامتلك نصف الساعة الاخيرة ونقول لقد نجا الهلال من هزيمة كبيرة بسوء الطالع الدي لازم مهاجمي المريخ فالهلال سوف تدركون انه بعيد من مستوى المريخ بمراحل عند بداية الدوري الممتاز
  • #7
    Shehab Eldien Elmenshawi 01-25-2015 12:0
    تعليق غريب في ظل المباراة التي شاهدها الجميع امس والتي قدم فيها المريخ مستوى مغاير عن ماظل يقدمه في السنوات الماضية لأول مرة نرى فرقة مريخ شابة تتناقل الكرة بسرعة وخفة ورشاقة نتمنى ان تنقل الحقيقة بعمودك المقروء حتى لاتفقد مصداقيتك لدى القراء ..... وشكرا
  • #8
    omer 01-25-2015 12:0
    ياخي انت مابتحس ؟ مابتقرأ التعليقات ؟ هل انت تتعمد اثارة غضب وكراهية القراء ؟ ياخي خلي عندك دم شوية.
    معقول الناس دي كلها غلط ومخدرنها المطبلاتيه القاصدهم ؟ ياخي القراء اذكي من معظم الصحفيين الذين هم في الحقيقة مشجعين .
    يعني انت حسي مخلي المباراة كلها وعامل ليك عنوان بإسم بكري ؟ من يوم سجلوها وانت تكتب ده كلو ماكفاك ?
    بالجد انت مريض وحاقد وعندك غبينة وعقدة نقص من مزمل وجمال الوالي - ماممكن كتاباتك كلها تكون صدي لما يكتبه مزمل .
    احسن واسهل ليك تخلي الصحافة وتقعد تعلق علي مقال مزمل في المواقع الاكترونية وتنتقدو زيك وزي اي قارئ بدل ترفع ضغط آلاف القراء - ربنا يهديك ويشفيك .
  • #9
    Hajjam 01-25-2015 12:0
    لله درك يامحمد سعيد..ليس لانني هلالابي واعجبني كلامك..ولكن اذا ركز الكتاب في عيوب فريقهم قبل ان يدخلوا في عيوب الفريق الاخر هذا هو عين العقل...والسبب الرئيسي في تدمير الكرة السودانية هو التطبيل والمكابرة والتركيز علي عيوب الاخرين...وصيتي لاهلك المريخاب...اسمعوا كلام الببكيكم...
       الرد على زائر
    • 9 - 1
      ياسر بوب 01-25-2015 09:0
      غريبه... مع انك ما قاعد تكتب كلامك ده للكتاب الهلالاب... مافي كاتب هلالي واحد بكتب عن عيوب الهلال ولا بتكلم عن امور شخصيه زي هذا المتصحف... خلي عندك مبدأ لمن تعلق و خليك محايد ... مش تكتب هنا اعجبك كلامو لانو اساءه للمريخ و تمشي لي كتاب الهلال البمجدو في فريقهم في الهينه و القاسيه و برضو يعجبك كلامهم ...
  • #10
    عماد النور 01-25-2015 12:0
    انا ماعارف البخليني اقرا عمودك دة شنو ياخي هيجت لي المصران وفقعت لي المرارة انت اتفرجت في ياتو كورة انت
  • #11
    بكري الحاج 01-25-2015 11:0
    شكرا اخونا محمد علي تحليلك الرائع
    وشهد شاهد من اهلها
  • #12
    ناصر 01-25-2015 11:0
    و الله الإخوان ما قصروا وقيموا ليك مقالك بوضوح،قمة في التناقض...ياخ ما تخلي دوافعك الشخصية تطغي علي مهنيتك ،القلم اماااانة ،ياخ أية زول شاف اوكرا الغاني ده،عرِف انه زول فاهم كورة كويس،و ان شاءالله نستفيد منو.
  • #13
    ابو قصى الدمام 01-25-2015 11:0
    الذى لا شك فيه ان وليد و فيصل كانا نقطة تحول الهلال و كان الهلال هو الافضل على الاطلاق حتى الدقيقة 21 من عمر الشوط الثانى و بعدها تقاسم الفريقين فرصة مؤكدة لبكرى تعامل الحارس فيها بثبات و اخرى لكاريكا و انقذها المتميز دوما الحارس جمال. اما الشوط الاول كانت الافضلية للهلال حتى 15 دقيفة و بعدها تسيد الفرق المريخ و اظن النتيجة عادلة و مفيدة للفريقين و نقول كسب المريخ حارس و علاءالدين كماوضح يصمات وفكر المدربين غارزيتو و باتريك ولوليد هو مستقبل الكرة السودانية بعد يقوى عوده قليلاالرياضة رسالة و تسامح ياشباب و اتمنى للفريقين التوفيق فى الاستحقاقات الافريقية.
  • #14
    ساري 01-25-2015 11:0
    يسألني الله إنك لا تمت للرياضة ولا للنقد بصلة ناهيك أن تمت للمريخ ،،، الله يسامحك
  • #15
    جلابي --- الدوحة قطر 01-25-2015 11:0
    والله والله لم اقرء بقية مقالك فقط اول سطرين ..واتيت للرد علي اكبر حاقد في الدنيا...انت لا تستحي والله لا تستحي فهلالك النازل فيه كثير تلج خرج من هزيمه ساحقه ..وكتاب الهلال انفسهم اعترفو بتفوق المريخ وان فريقهم تعبان ..او يمكن حضرتك كنت نايم وصحيت فجاه ولقيت الكوره في القرعه وكتبت مقالك السخيف..انت يازول لصالح منو بتكتب والحرشك منو عليك الله ..والله كتاباتك دي وراها موضوع كبييييير
    اخجل ياخي ...اخجل ..وبطل حقد
  • #17
    ابوالفاضل 01-25-2015 11:0
    حاقد حاقد جدا اها جمال الوالي ماشي شهر 5 بتقعد تكتب بحياد ولا بشوف زول تاني تتقيأ فيهو سمومك ونحنا زاتو مايشرفنا انتمائك للزعيم ياخي كتاب الهلال اعترفوا بتفوق المريخ الله يشفيك يابني ادم.
  • #18
    احمد يس 01-25-2015 11:0
    هذا الصحفي يكتب في وصف مباراة لا يمت بصلة بمباراة القمة بالامس يارجل اكتب كلام مقنع ولاتشفي غليلك لاغراض شخصية حتي الصحفي المتعصب الهلالي الاستاذ ابراهيم عوض اعترف وكتب بان المريخ كان افضل من الهلال والصحافة رسالةوامانةوصدق في الحديث وربنا يشفيك.
  • #19
    الضرغام 01-25-2015 10:0
    المتصحف محمد ناقص حاقد حزين
       الرد على زائر
    • 19 - 1
      أبو ليلى 01-25-2015 11:0
      الكل يعلم حقدك علي جمال الوالي ويظهر دائما في كنت ... لكن ان تقلب الحقائق بهذه الصورة سوف يجعلك مضحكة وسخرية للقراء .. ولو وافقناك بان المريخ سئ فالهﻻل كان اسوء وهذا .. اتقي الله فالكلمة امانة
  • #20
    ياسر بوب 01-25-2015 10:0
    اسلوب واضح انو مقصود به مزمل ابوالقاسم و جمال الوالي لشئ في نفسك تجاههم ... انسان تشائمي للحد البعيد .. ما ح تكون ملكي اكتر من الملك .. اخوانا الهلالاب نفسهم مقتنعين ان المريخ كان متفوق معظم اوقات المباراه و الدليل معظم الكتاب الهلالاب اعترفو بي الحقيقه دي .. جاي انت تقول غير الناس الشافتو؟ ... ي اخوي اذا الامجاد الابى الوالي يديك ليها دي حارقاك للدرجه دي وريني عنوانك وين و انا بجيبه ليك .. لكن على شرط تشتغل فيها و تخلي مهنه الصحافه دي ...
  • #21
    ادروب شراب الروب 01-25-2015 09:0
    اولا ان ماكتبته عن المباراة غير صحيح وان تحليلك يدل على انك لم تشاهد المباراة وسبحان الله انا بالامس علقت على مقالك وقلت انمقالك جاهز قبل المباراة وحددت اهدافك قبل ان يطلق الحكم صافرة انطلاقة المباراة والدليل على ذلك ان تحليلك فى وادى والمباراة فى وادى اخر بعيد كل البعد عن وافع المباراة فنحن شاهدنا المباراة كما شاهدتها انت ولكن الذى رايناه يختلف عما رأيته انت فرؤيتك تتحكم فيها الاحكام المسبقة والضغائن التى تعتمر فى دواخلك فقد اجمع كل من شاهد المباراة اجمع على تميز اوكرا حتى الاهلة الجميع اتفق على المباراة تسيدها المريخ فى الشوط الاول لامتلاكه خط الوسط نسبة لتوهان بشة وسيدى بيه تبدل الحال فى الشوط الثاتى بعد التبديلات باترك فاستعاد السيطرة على الوسط وقاسم المريخ السيطرة حتى غلاة الاهلة ذكروا هذه الحقيقة ولكن خيالك صور لك ان المباراة فرصة لتبث سمومك وتشفى غليلك انت تكتب من منطلقات شخصية ومن احقاد دفينة ومن نفس مريضه ناسيا ان القلم امانة وان ماتكتبه من اراء منطلقها الاول كرهك لبعض اهل المريخ وان الحقد اعماك عن قول الحقيقة اخيرا لقد سقطت فى مستنقع الحقد وسقطت فى امتحان المهنية ونسأل الله ان يشفيك مينقى قلبك من الحقد والحسد
  • #22
    ادروب شراب الروب 01-25-2015 09:0
    اولا ان ماكتبته عن المباراة غير صحيح وان تحليلك يدل على انك لم تشاهد المباراة وسبحان الله انا بالامس علقت على مقالك وقلت انمقالك جاهز قبل المباراة وحددت اهدافك قبل ان يطلق الحكم صافرة انطلاقة المباراة والدليل على ذلك ان تحليلك فى وادى والمباراة فى وادى اخر بعيد كل البعد عن وافع المباراة فنحن شاهدنا المباراة كما شاهدتها انت ولكن الذى رايناه يختلف عما رأيته انت فرؤيتك تتحكم فيها الاحكام المسبقة والضغائن التى تعتمر فى دواخلك فقد اجمع كل من شاهد المباراة اجمع على تميز اوكرا حتى الاهلة الجميع اتفق على المباراة تسيدها المريخ فى الشوط الاول لامتلاكه خط الوسط نسبة لتوهان بشة وسيدى بيه تبدل الحال فى الشوط الثاتى بعد التبديلات باترك فاستعاد السيطرة على الوسط وقاسم المريخ السيطرة حتى غلاة الاهلة ذكروا هذه الحقيقة ولكن خيالك المريض صور لك ان المباراة فرصة لتبث سمومك وتشفى غليلك انت تكتب من منطلقات شخصية ومن احقاد دفينة ومن نفس مريضه ناسيا ان القلم امانة وان ماتكتبه من اراء منطلقها الاول كرهك لبعض اهل المريخ وان الحقد اعماك عن قول الحقيقة اخيرا لقد سقطت فى مستنقع الحقد وسقطت فى امتحان المهنية ونسأل الله ان يشفيك مينقى قلبك من الحقد والحسد
  • #23
    تونجيلا 01-25-2015 09:0
    لقد تفرد الهلال وانفرد بالسيطرة على الكرة في معظم فترات مباراة الأمس وكان الأعلى كعباً والأوفر فرصاً.. وجاء هدف علاء ليحفظ ماء الوجه في الشوط الأول..!! ألا تكون شاهدت مباراة اخرى.... المباراة شاهدتها الناس جميعا المريخ كان مسيطر بنسة 70% لو بتفهم كورة اصلا" بكرى وعنكبة ضيعوا فرص كانت كفيلة بفوز المريخ بنتيجة 3 / 1. الحق ابلج .
  • #24
    محمد برجاس 01-25-2015 09:0
    استاذ كامل
    السلام عليكم،،،
    لك الشكر كل الشكر علي صراحتك الرائعة واقول لك ان الخدعة كانت من الجانبين فقد توقعت من واقع ما يقوله اعلامنا الكاذب اني ساري هلالا يسطع في سماء الخرطوم، لكني تفاجات باشباح في الملعب ولو لم تكن الكرة مجنونة لكان المريخ فائزا لا محالة، فريق ليس له شخصية ولا وجود في الملعب، كان الله في عوننا امام الفريق الزنزباري واتمني ان لا نصبح مثلكم ونغادر التمهيدي من اوسع ابوابه.
  • #25
    Mohammed Ahamed Kashan 01-25-2015 09:0
    الاخ الكاتب اظنه ماشاهد الكورة لانو عكس الحكاية, قال الهلال اعلى كعبا والافر فرصا , المريخ لعب كورة جميلة وادى افراده بنسجام تام وفى بداية الشوط الثانى ضاعت فرص حقيقية بالجملة ,وهدف الهلال التعادلى نتيجة لعدم التغطية من قبل افراد الدفاع وبخاصة امير كان فى لحظة شرود ذهنى , المباراة فى مجملها كانت جمبلة , وبعدين الاخوة فى الاعلام الزموا الصبر لان الفريقين فى بداية الموسم والحكم صعب وفيه ظلم كبير للاعبين .
  • #26
    Mohammed Ahamed Kashan 01-25-2015 09:0
    الاخ الكاتب اظنه ماشاهد الكورة لانو عكس الحكاية, قال الهلال اعلى كعبا والافر فرصا , المريخ لعب كورة جميلة وادى افراده بنسجام تام وفى بداية الشوط الثانى ضاعت فرص حقيقية بالجملة ,وهدف الهلال التعادلى نتيجة لعدم التغطية من قبل افراد الدفاع وبخاصة امير كان فى لحظة شرود ذهنى , المباراة فى مجملها كانت جمبلة , وبعدين الاخوة فى الاعلام الزموا الصبر لان الفريقين فى بداية الموسم والحكم صعب وفيه ظلم كبير للاعبين .
  • #27
    محمد رحمة اله 01-25-2015 09:0
    اظنك شاهدة مباراة غير التي شاهدها الناس المريخ لعب بالامس كوره منقوله واستلام وتمرير وقلة الاخطاء في التمرير والكوره تطلع من الدفاع باص علي غير العادة ارجوكم ياحملة الاقلام احترموا عقولنا شويه لان الجماهير تعرف اكتر من معظم الصحفيين اتقوا الله فينا
  • #28
    اسد الهلال 01-25-2015 08:0
    الاخ سعيد انت صحفي حقاني ولذلك لاتتوقع ان ترضي عنك بعض جماهير المريخ لانخم يحبون من يكتب الوهم ويعيشوا هم الوهم ويصبح المريخ وهم في وهم
  • #29
    ادروب شراب الروب 01-25-2015 08:0
    الم اقل لك بالامس انك حاقد وكاذب لم تشاهد المباراة وان خيالك المريض صور لك اوهام لتبث سمومك
  • #30
    Abu Hamid 01-25-2015 08:0
    يا اخونا المتصحف محمد ناقص حزين ... انت بتتكلم عن مباراة تانية غير حقت امبارح ولا شنو ... بدون تعصب كان المريخ هو الأفضل معظم زمن المباراة ما عدا بعض الفترات في الشوط الثاني ... وكان بكري المدينة واوكرا نجوما وادوا بصورة ممتازة ... حقدك على إدارة المريخ هو سحر كتاباتك البائدة غير المنطقية .. بعدين شنو المشكلة انو اعلام الفريقين يتوعد الاخر بشر هزيمة فهى... معروف انها جزء من التهيئة النفسية لصالح فريقهم والحرب النفسية على الخصم .. يعني انت ما قريت كتابات الاهلة وسمعت تصريحات الكاردينال ... بعدين أداء فيصل موسى ووليد علاء الدين لم يكن ذلك المميز بل نقول انه لا باس به .. ياخي ارحم نفسك وارحمنا وورينا بصراحة مشكلتك شنو مع إدارة المريخ بدل اللف والدوران واى مقال ليك ينتهي بإدارة المريخ بنظرية الزول البتكرهو في الظلام بتحدر ليهو
       الرد على زائر
    • 30 - 1
      Hajjam 01-25-2015 12:0
      اسلوبك عاجز...ركز علي كلام الكاتب وليس علي شخصه واسمه...
  • #31
    ابو المصطفي 01-25-2015 08:0
    اسلوبك ما زال به نوع من التشفي وليس التحليل المنطقي . لن تكسب مشجعي الهلال بهذا الأسلوب , بل ستكون مضحكه . الله يشفي ..
  • #32
    Mohamed 01-25-2015 07:0
    أرجوك تحاول تقرأ عمود ابراهيم عرض عشان تعرف انك ملك اكثر من الملوك. وبعدين لأن كتاباتك كلها عن مايكتبه الآخرون الطبلاتيه قالوا والمطبلاتبه عملوا لذلك صعب عليك جدا ان تكتب من رأسك اليوم
  • #33
    نووور 01-25-2015 07:0
    لقد تفرد الهلال وانفرد بالسيطرة على الكرة في معظم فترات مباراة الأمس وكان الأعلى كعباً والأوفر فرصاً.. وجاء هدف علاء ليحفظ ماء الوجه في الشوط الأول..!!

    * انطلق وليد وفيصل وقاد انقلاباً في وضعية المباراة وحولا كفة السيطرة لصالح الهلال وبدأ سيناريو التعادل من قدم فيصل وترجم كيبي الكرة المعكوسة من نزار بطريقة مقصية رائعة تفرج عليها سالم..!!


    تناقض غريب من صاحب غرض

    ياخي ارحمنا
  • #34
    Mohamed 01-25-2015 07:0
    بالله عليكم الراجل دا في حاقد على مريخ مثله ؟؟؟ نفترض انو الكوره دي مافي زول شافها غيرك كدي حاول اربط بين فقرات عمودك دا. جاء قون علاء والهلال كان ناقص ومن قبلها علو كعبه وعملية الانقلاب. الحاجات الا تكون حصلت في اكثر من مباراه ارحمنا ياخي
  • #35
    زاير 01-25-2015 07:0
    الاخ محمد كامل اعتقد ان الفريقين قدما مستوى جيدا ومتقارب يؤكد انهما سيصلان الى ادوار متقدمة فى البطولة الافريقية...وتركيز جمهور المريخ على بكرى لا يؤثر على اداء الفريق بقدر ما يؤثر على اداء اللاعب نفسه...واوافقك ان ادارة المريخ فيد و فرطت فى وليد و فيصل
  • #36
    محمد علي 01-25-2015 06:0
    لقد تفرد الهلال وانفرد بالسيطرة على الكرة في معظم فترات مباراة الأمس وكان الأعلى كعباً والأوفر فرصاً.. وجاء هدف علاء ليحفظ ماء الوجه في الشوط الأول..!!
    إنت كنت حاضر كورة تانية ولا شنو !!!!
       الرد على زائر
    • 36 - 1
      مهاجر 01-26-2015 05:0
      والله صدقت
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019