• ×
الجمعة 26 فبراير 2021 | 02-26-2021
يعقوب حاج ادم

دخول الحمام مش زي خروجو ياهيثم !!!

يعقوب حاج ادم

 4  0  1744
يعقوب حاج ادم

الحديث الصريح الذي ادلي به الاستاذ احمد عبد القادر نائب رئيس مجلس ادارة نادي الهلال والذي اكد من خلاله بان المجلس لم يفكر مجرد تفكير في اعادة قيد اللاعب المشطوب لسوء السلوك هيثم مصطفي من جديد في كشوفات الفريق الهلالي مشددا علي ان اللاعب هيثم لن يدخل مقر نادي الهلال الا زائرا مثله مثل اي شخص عادي وغير ذلك فلا والف لا وقد وجد الحديث الشجاع الواضح الصريح هوى في نفوس الكثيرين من جماهير الهلال الوفيه التي كانت وجهة نظرها واضحه في الموضوع وهي ترفض عودة القائد المشطوب جملة وتفصيلا بعد ان لوث تاريخه الناصع وهو يرتدي شعار الوصيف الواهن الضعيف بل ويؤكد وبلا حياء بان الثلاثة اشهر التي قضاها في صفوف الوصيف تعادل ال 17 عاما التي قضاها في احضان الهلال الاعظم وهذه الجمله وحدها كفيله بقفل الباب في وجهه الي مالانهايه وحمدا لله أن جاء الحديث من لدن رجل مسئول في النادي ليقطع قول كل خطيب ويبعث الراحه والطمأنينه في كل النفوس الهلاليه لنسدل الستار وبصوره قاطعه حول هذا المسلسل الخاوي والذي هو بلا مضمون ونحن من زمان قلنا للمشطوب من ترك داره قلي مقداره وهسه اللي يشوف قضيته مع اهله المريخاب بعد ان ورط نفسه معاهم ودخل معاهم في ورطه شديده يحله منها الحلا بله والجماعه ناوين عليهو نيه شديده عشان يوروهو انه دخول الحمام مش زي خروجه وبصراحه بقدر العتب والزعل اللي كنا نحمله في حنايا افئدتنا تجاه هذا النجم العاق بعد ان ضرب عرض الحائط بجماهير الاسياد الا اننا بتنا نتعاطف معه ونرثي لحاله بعد ان شال ايدو وطبظ بيها عينه ونتمني صادقين ان يحكم اخوتنا الوصفاء صوت العقل ويبتعدوا عن روح العداء التي يحملونها تجاه هذا النجم الذي لولاهو لما استقرت بطولة الممتاز بين اسوار الوصيف في الموسم الماضي والدليل انه بمجرد ابتعاده عنهم عادة ريما لحالتها القديمه وفشل الوصيف في الاحتفاظ ببطولة الهلال المحببه وسينتظر الوصفاء للموسم القادم لتحقيق البطوله بعد ان دشنوا صفوفهم بعدد من لاعبي الهلال لانهم يمتلكون ثقافة الممتاز وسيقودونهم الي الفوز باللقب وهذا هو الهدف الأسمي للمريخاب من جزئية الاستعانه بنجوم الهلال وياهيثم ربي يفك كربتك وربنا يهديهم يدوك شطبك عشان تمشي بيهو اهلي شندي أو هلال التبلدي وعشان نشوف المتعه اللي قلت انك ستنثرها علي المستطيل الاخضر مايبقي الكلام فرفرة مذبوح ساكت ..

قبيل ماقلتوا اروش .. وقلتوا زول ماسوره .. كيف هسه يبقي العقرب الاسطوره ؟؟؟
___________________________
هذه الابيات التي تنضح بالسخرية والتندر علي اهلنا الوصفاء وهم يلهثون خلف كل ماهو هلالي وصلتني من الاخ محمد حمد عبد الرحمن وهو هلالي قح والابيات من نظم الدكتور نصر الدين بدوي من سلطنة عمان ولسلاسة الكلمات ودقة التعبير الذي جادت به قريحة الدكتور البدوي اثرت ان اشرك فيه اخوتنا الهلالاب ليستمتعوا بهذا النظم المموسق من يراع الدكتور البدوي .حيث يقول فيها لافض فيه ..

جابو (كلتشي) بدري وقالوا شغلو نضيف
قالوا الود مميييز. و مستواهو حريف
(طمبل) قالوا فرفارة ... وخطير وعنيف
الا الحاله ثاااابتة .... ولسة برضو وصيف
قالوا قبيل هلالكم .. .. فيهو درة فريدة
كابتن من ذهب .... عندو المزايا عديدة
لو عاوزين فريق بي طلة زاهية جديدة
في الاساس نسعى لازم نسجل و (سيدا)
إعلام الضلال ... قال تيمنا اصبح اعد
وقال يا (سيدا) اصلا مستواك متصاعد
قالوا لي فريقنا ... كل المنابر صاعد
الا بشوفو في التمهيدي لسع
قاعد هسة الليله فرحان ب (المدينة) الجاهو
مليارات هبطرررش ... غايتو الله اداهو
في كل عام ... في بنسمع الكلام إياهو
والتمهيدي ماااااا اظنك .....
بتتخطاهو قبيل ما قلتو اروش. وقلتو زول ماسورة
فالح في الجري .. وما عندو حبة كورة
زولا قلتو اصنج وكورتو مااا مشكورة
كيفن هسة يبقى (العقرب الاسطورة) ؟؟
بس ياهو النفاق ... الفيكم اصبح عادة
كل يوم في الكضب والغش تزيدو زياده
بس فالحين تطبلو .. للرئيس كالعادة
شان يعطف عليكم ... وتلقو منو إشادة

التمريره الأخيره ...
____________

في اديس او في جبال كلمنجارو او في العرضه جنوب الحال برضوا يغني عن السؤال يعني لو وقع في اديس او في كينيا او في العرضه جنوب اللي حايتغير شنو؟ مهند ياهو مهند ذلك اللاعب ((الريلاكس)) البارد الفاقد للروح القتاليه ولو نفختوه نفخ ماحايتغير والدكه محمداهو واللي مايشتري يتفرج .. وبكره الشمس بتطلع بكره ..



امسح للحصول على الرابط
بواسطة : يعقوب حاج ادم
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    الأرباب الجعلي 11-06-2014 08:0
    ياعمك أخجل هيثم ده أكلتو لحم ورميتو عضم ماكان نغمة محببة أنا لو في محل المريخ أجددليهو تاني عشان مع العقرب وكلوتي وصواريخ مهند ؟
  • #3
    ابراهيم محمد الحسن 11-05-2014 08:0
    ههههه
    جنس جقلبة وفرفرة .. لدغة العقرب حاااارة .. تسمم البدن ..
    وتصيب بالهضربة والهذيان ..
    واتهضربي ..
  • #4
    kaka 11-05-2014 06:0
    هيثم سيبو فترنا منو وعرفنا رأيك فيو ،، يلا شوف لينا فاطمة شاش دي حكايتها شنو وماسكة على الشعب السوداني شنو والكاردينال بالذات ؟؟؟ وهل سبق أن تعرضت لكشف نفسي لترعف ونعرف مشكلتها مع لاإساءات والتجريح والعنتريات والتلذذ بالتسبب في جرح وألم الآخرين ،، أكيد بتكون مؤيدها،،
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019