• ×
الإثنين 14 يونيو 2021 | 06-13-2021
محمد عبده اسماعيل

أصداء

محمد عبده اسماعيل

 0  0  1517
محمد عبده اسماعيل

هلال زي ده حلو حلا

الله يدينا الفي مرادنا ...
الحمدلله الله أدانا الفي مرادنا ... قونين حلوين ... حلوين حلا ... سكتت كل الخشامة ... هدف لوحة منقوض ... والاولاد لم ييأسوا ... قادوا المباراة بكل اقتدار إلي النهاية المحتومة ... النهاية التي أسعدت كل السودان ... شماله وجنوبه ... شرقه وغربه ... ابتهج الجميع ... فرحوا وهللوا وصفقوا ورقصوا ... كل الخرطوم فرحانه بل كل السودان فرحان واللون الأزرق طغي وغطي على كل الالوان ... الفرح يعم كل السودان وخارج السودان ... ماعدا قلة قليلة جافاها النوم ... الله يدينا الفي مرادنا ... الحمدلله نلنا المراد وكان المراد هدفين رائعين ... والثالث قدينا بيهو عين الشيطان في بداية المباراة .. واحتسبناهو صدقة جارية اثمرت هدفين في نهاية المطاف ... كمبسة سواها ولا يخاف عقباها ... كمبسة بكل جرأة اخرج امبيلي وسادومبا دفعة واحدة ... كمبسة خلانا في حيرة ... ياأخوانا كمبسة ده داير يعمل شنو؟ ,,, في زول عاقل بيطلع سادومبا وامبيلي دفعة واحدة ... اتاريهو كمبسة نايملو فوق رأي ... كمبسة جاب الود بشه ... وجاب الود كاريكا !!! تحسبوا لعب ؟؟؟ كمبسة قال ليهم يابشه وياكاريكا باقي الوقت ده حقكم ؟؟ ونحن حيرانين نفكر؟؟ ياربي كمبسة ده داير يعمل شنو؟؟ يامزمل انت قلت دايرنها تسعة طويلة؟ ... لكنها طلعت قصيرة التيلة؟؟؟ ... كمبسة من ما قرأ كلام مزمل وانه دايرها تسعة طويلة ... حاول يطمئن مزمل قام سحب أمبيلي وسادومبا ... ياأخوانا في زول عاقل بيطلع سادومبا ... ما قلت ليكم كمبسة ده راقدلو فوق رأي ... الود بشه عمل ون تو حلو مع البرنس خلو الجماعة يتراجفو ... وكاريكا ما صدق خطف الكورة وقال لمهند خد سجل ومهند ما كضب وما صدق كمان قام رسل الكورة زاحفة تتهادي داخل المرمي ومحمد كمال لا حس لا خبر ... وولعت النيران جوه الاستاد المفخرة ... ما قلت ليكم كمبسة ده راقدلو فوق رأي ... وبله لما فتر وشاف الحصل قال ربنا يسترنا الله من ناس كمبسة ديل وعملو رفسة شينه كده خلتو ياخد الكرت الأحمر ويمشي يرتاح بره أصلو أولاد كمبسة ديل لما يفوروا خترين شديد ... اها كمبسة قال للاولاد دسوها ولما الاولاد دايرين يدسوها جاتم الحجارة من المصطبة العجيبة ... يا اخوانا الصفوة ديل مالهم ... يعني ياود عبدالقادر المعز ده يعمل شنو؟ يخلي الحجارة دي تكسر ليهو صلعتو دي ولا يعمل شنو؟ ماهو لازم يضاري صلعتوا دي من الحجارة ... هو نحن كنا لاعبين في الرد كاسل ولا في غزة؟؟ وبعدين ياود عبدالقادر عشان طردته بله جابر قمت طردته المعز محجوب؟ انت قايل نحن ما عندي احتياطي ولا شنو؟ وكما شوف كمبسة عمل شنو؟ والله كمبسة ده امبارح قرب يوقف قلبي ... كمبسة قال للكابتن البرنس تعال ياكابتن ارتاح جنبي هنا وخلي الدعيع ده يقيف الدقائق الباقية دي ؟؟؟ اصلو كمبسة عارف انه ناس وورغو ديل ما بيعملوا حاجة ... وانا من الأول من ما شفته وورغو لاعب قلت والله وورغو ده مكسب كبير للهلال ... وفعلاً وورغو بيحاور وبيحاور وبيحاور وفي الاخر اولادنا بياخدوها بكل سهوله منه ؟؟؟ اها النرجع ونشوف تاني حصل شنو ... الدعيع استلم الكورة وهاك ياباص طويل ... الباص الطويل ده مش زي التسعة الطويلة يامزمز؟ الباص الطويل ده وصل لسفاري ولكن كان كاريكا اخف واسرع وعينك ما تشوف إلا والكورة طولي في شبكة ود كمال ... والناس كانت حارسه التسعة الطويلة القلبت وبقت ثلاثة قصيرة التيلة !!! والله ياكمبسة طلعت مفتح وشفت ... سادومبا وامبيلي مرة واحدة بره ؟؟؟ والله انا كنت قايل الأرباب صلاح إدريس هو الشفت براهو ... لكن ياكمبسة انت طلعت شفت اكثر من الأرباب زاتو .... وكمان النوريكم حاجة تانية ... المعلق العربي عدنان حمد كراعو دايماً خضرا علينا ... المرة الفاتت لما علق على كورتنا معاكم سنة (2002م) بتذكروها؟؟؟ اها الكورة ديك الاسمها كورة الحفرة لما معتز كبير شاط الكورة وقلتو ضربت في الحفرة ودخلت القون وفاز الهلال ... نحنا عندنا معزه خاصة للمعلق عدنان حمد عشان كده ما بنخذلو ابداً المرة الفاتت فزنا بقون معتز كبير ... والمرة دي بقت قونين ... وفي كل مرة بنزيد الغلة قون ... يعني لو جانا في الدورة التانية وعلق على الكورة أكيد النتيجة حتبقي ثلاثة أقوان ... لأنه كل مره بنكرمه بقون زيادة ... انا النقيف لحد هنا وبنرجع تاني ... لأنه والله الهلال ده حلو حلا ... والله أدانا الفي مرادنا ...
امسح للحصول على الرابط
بواسطة : محمد عبده اسماعيل
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019