هكذا كتبوا :
سيكون دفاع المريخ وحارس مرماه في مواجهة أقوى هجوم في بطولة سيكافا لﻸندية في نسختها الحالية المقامة برواندا عندما يلتقي اﻷحمر عزام التنزاني يوم اﻷربعاء المقبل في الدور ربع النهائي
اقوي هجوم هجوم عزام
عمركم سمعتوا بفريق اسمه عزام
هم يتمنون ان شعب السودان يفرح بسيكافا
وهذا مستحيل لان شعب السودان لا يفرح الا ببطولة الكبار
الغريب ان جموع اهل المريخ خرجت في الشوارع تهليلا وتكبيرا
ونثر بعضهم البخور والحلوي في شوارع العرضه جنوب
واعلام واغاني وزينات وفوق فوق مريخنا فوق
والمريخ والمجد توأمان
كذلك خرجت صحفهم الحمراء والصفراء لتقول :
المريخ ينثر الطرب .. يفعل العجب .. ويُقصي حامل اللقب
وتراوري خطير وﻻ يمكن إيقافه
المريخ القيافة يطيح بحامل اللقب من سيكافا
ورغم كل هذا لم يلتفت شعب السودان لكل هذه الخطرفات الحمراء
فمازال الشعب حزينا علي خروج الهلال
وكانت فرحته كبيره فرحا حين تأهل الهلال لبطولة الكبار
الانسان السوي اخوتي هو من يفرح ويحزن للاحداث العظيمه
ولو كانت سيكافا بطولة حقيقيه ومعترف بها رسميا لفرح بها كل اهل السودان
ولباركنا للمريخ فوزه علي بنابر الصومالي وتعادله مع فيتالو
وواسيناه في هزيمته البوليسيه
مستحيل شعب السودان الذواق لكرة القدم ان يفرح لبطوله مغمورة
ومستحيل شعب السودان المحب للعبه ان يفرح لمباريات اشبه بمباريات ميدان عقرب والحواري
شعب السودان اخوتي يتطلع الي بطولات كبري
وشعب السودان اخوتي كان يتمني ان يفوز الهلال ببطولة الكبار
فشعب السودان كان فخورا بأن الهلال ضمن الثمانيه الكبار
شعب السودان لا يمكن ان يعود الي الوراء ولمباريات دون المستوي
شعب السودان لا يمكن ان يتفرج علي البوليس والشرطه والاكاديميات وفرق الايسكريم
شعب السودان لا يمكن ان يصفق لبونامويا والتوسكر والمان الصومالي والغزاله التشادي
شعب السودان الذي يمتع نفسه برونالدو وميسي لا يمكن ان يصفق للاعبي اوليانز الكيني او عزام فريق الايسكريم او ايدام الاثيوبي او اطلع بره وخش تاني
شعب السودان الذي شاهد آخر كاس عالميه كيف له ان يجلس لمدة ساعة ليشاهد المريخ والبنابر الصومالي وذلك العك الكروي
شعب السودان البيموت في الكوره ما ممكن يشاهد فرق عمرها ما لعبت في بطولة الكبار
لا تفسدوا علي شعب السودان ذوقه الكروي الرفيع بمستويات سيكافا الهزيله
العبوها وانتو ساكتين ودون فرقعات اعلاميه
فوزوا بكاساتها وانتو ساكتين ودون مواكب في شوارع الخرطوم
لا داعي لاحتفالات الوالي في استاد المريخ بفوز المريخ بسيكافا
ولا داعي لان تغني لنا انصاف مدني
ولا داعي لدعوة الاهلي المصري وشوبير
لا دعي لمقالات سلك ومزمل ومعاويه صابر والكاسات المحمولة بحرا
سيكافا دورة لا وجود لها علي الخريطه الرياضيه
فارجوكم لا تزعجونا بسيكافا



[[[]]] لصوص سودانيين في مطار الخرطوم :
في رحلة اول امبارح سافرت ابنتي الي السودان وعلي فلاي دبي وعند وصولها الي البيت وجدت ان الكثير من المحتويات تم سرقتها من الشنطة
واتصلت بي فقلت لها الي الله المشتكي يا هودا السودان
فهذه الاشياء لا تحدث الا في السودان وفي اي مطار في العالم لا يمكن ان يسرقوا ما في حقيبتك
وبما انني قد سمعت كثيرا عن شكاوي الاخوة وتعرضهم لمثل هذه الاشياء في مطار الخرطوم وتعمد عمال العفش علي تكسير شنط المسافرين الا انني وصلت لقناعة بان ما يحدث هو نهب منظم ربما يشارك فيه مسئولون في المطار
زي في الحله لامن نقول الحرامية متعاونين مع الشرطه
واسرقوا جيبوا ونتقسم مع بعض
فالحوادث متواصله وفتح شنط المسافرين وسرقتها لا تتوقف
المطار اخوتي واجهة حضاريه في كل الدول ولكننا في السودان نجعله مكانا لتشويه صورة بلادنا
والخواجات قالوها صراحة ان مطار الخرطوم هو اسوء مطار في العالم
فوضي وعشوائيه وتدني في الخدمات وسرقات
جيوش من الاداريين ومدير مطار ومهندسين وعمال يتقاضون مرتباتهم بانتظام ولكن تظل الخدمة هي الاسوء بين كل المطارات التي من حولنا
لقد اثبتنا بالدليل القاطع اننا شعب قد فشل كليا في ان يحكم نفسه بنفسه



[[[]]] النقاط البارده :
يجب اخوتي ان لا نعول كثيرا علي نقاط فيتا البارده - فمادام الهلال لم يجتهد في جمع نقاطه ( بضراعه ) في الميدان فلا تنتظروا ان يهديها لنا السيد قرن شطه - وبعد ده لا اظن ان الهلال وان عادت اليه نقاط فيتا قادر علي مواصلة المشوار الافريقي وفي الطريق فرق جاهزه قويه لا تتنازعها الخلافات و امسكوها فريق فريق فكلهم يعيشون الاستقرار وينعمون بالوحدة والتخطيط السليم - اين نحن من كل هذا - وانسوا الموضوع



محمد حسن شوربجي