وداعا هلال الجمال

وهكذا نودع اليوم هلال الجمال وهو يستعد لموقعة مالي

تحرسه اقدام سيدي بييه ونزار واتير وجمعه وكوليبالي

وانشاء يرجع منتصر ويحقق امانينا ويرد علي اللبالي بالي

ودعناك خلاص ياربوع نعود لك تاني بعد اسبوع

ونلقاك فوق زحل مرفوع وخيراتك تفيض نوع نوع

نرفع الاكف اخوتي وندعو الله ان ينصر هلال العز نصرا مؤزرا

نرفع الاكف اخوتي وندعو المولي عز وجل ان ينصر هلال الملايين في بلاد الماليين

نرفع الاكف اخوتي وندعو الله ان يخذل اعداء الهلال من شياطين حمر وصفر

نرفع الاكف اخوتي وندعو الله ان يخيب ظنون فريق العواجيز المنتظر هزيمة الهلال

نرفع الاكف اخوتي وندعو الله ان يفشل مخطط جندلة الهلال في افريقيا

الهلال الليله كان غالب وده المهم والنابي طلع زول غتيت يا اخوانا

وهو لن يثبت علي تشكيله واحده حتي يحير الخصوم

وليخمن من يخمن عن تشكيلة الهلال امام الملعب المالي

٤ -٢-٤ /٤-٣-٤/٤-٣-٢-١

لن يكشف الهلال اوراقه

الملعب المالي كله كوليبالي وسيدي بييه

واحنا عندنا كوليبالي وسيدي بييه

والهلال سره باتع في نزار وبكري المدينه والقادمون من الخلف

ولتمد كل منتديات المريخ الملعب باسرار الهلال

والنابي قبل كده قال:

انا رجل احب الصراحة دائما .. ولا اطلق الوعود جزافا.. والنجاح في كرة القدم يتطلب التخطيط والبيئة الصالحة للعمل.. والترابط بين كل الشرائح داخل النادي..الان مهمتي هي بناء فريق باستطاعته مصارعة ومقارعة كبار القارة الافريقية.. وهذا الشئ لن يتحقق في شهور قليلة او في موسم واحد.. ومن يريد الالقاب عليه بالصبر والمثابرة.

قوة بطل مالي لا تخيفنا لان الهلال ايضا فريق مهاب ولديه من الخبرات في مجاهل القارة السمراء ما يكفي لان يضع له اي خصم الف حساب..وسنعمل جاهدين لاقصائه وتخطيه.. وعن تاثير المواجهة التي خسرها الهلال في اخر مباراة مع نادي مالي(جوليبا) في نصف نهائي البطولة الكنفدرالية عبر الركلات الترجيحية موسم 2012 .. قلل التونسي من اهمية ذلك موضحا ان الاندية الافريقية عموما تتبدل مستوياتها وتتغير في كل موسم.

هلال اليوم استفاد كثيرا من مباراة اهلي الخرطوم الذي قدم مباراة قوية بالجد

وفرحنا لان دفاع الهلال وحراسته مطمنه

وفرحنا لان وسط الهلال ومحاوره خطيره

وفرحنا لان هجوم الهلال رهيب ولكن النابي مازال يتكتم عليه ويخلط الاوراق

وخلونا نشوف مفاجأة النابي في مالي

واطمنوا وارقدوا عافية زي ما قال اخونا وحبيبنا كتاااحه

في بيت العزا كان هذا الشعر حاضرا :

شماعة الفشل ختوها فى الألمانى .. مريخ الفشل واليهو كج وأنانى ..

العيب مو المدرب واللعيبه وتانى .. إعلام الضلال كان السبب وهو الجانى ..

عالمى لا تكلمنى وبراى بتفشخر .. نسو كمبالا قادم وأصلو ما بتأخر ..

حلمهم الكبير أصبح سراب و إتبخر .. المريخ ضعيف طار الحمام وإتشخر ..

أخذو العبره من تيم الهلال طوالى .. ما بينفخ قرب مقدوده زى الوالى ..

يرعاهو الإله مسافر هناك لى مالى .. بالنصر المؤزر منايا ليك يا غالى .. * *

بتطردو المدرب وإنتو سبب الحاله .. تحرضو فى علاء الدين وسيدا عندو رساله ..

الخواجه عارف شغلو وإنتو عطاله .. إعلام الضلال سبب الضياع يا هاله ..

كل موسم تقولو فريقنا بطل القومه .. تجيبو إتنين مدرب وسريع تسوو خصومه ..

تطلعو فى البيانات وتكتبو المرسومه .. بعد ما تطيروا تب تجيبو إبراهومه ...

يامريخ جمال أنا عندى ليك رساله .. مافيك تب مروه عشان تفوتو مجاله ..

دواس أفريقيا حار مو فشخره وإجلاله .. راجيهو الهلال وأفريقيا يطوى حباله



يا حرام :

قالوا ان نجوم المريخ الاجانب يعيشون هذه الايام اسوأ فتراتهم بالمريخ بسبب الضغوطات النفسية التي يتعرضون لها من قبل الاعلام و الجمهور بجانب مجلس المريخ الذي قام بتخفيض رواتبهم بعد خروج الفريق من الابطال و يتوقع اجانب المريخ الحاقهم بالمدرب كروجر في اي وقت في حالة خسارة المريخ لاي من مواجهاته في بطولة الدوري الممتاز - والله مساكين اتبهدلوا في الغربه

قالوا :

مزمل ابو القاسم هو من يقوم بدور المستشار للسيد جمال الوالي بسياسات الاحلال والتبديل وهناك الان اسماء يريد مزمل ابدالها في الفرقة المريخيه وفي مقدمتهم هيثم مصطفي وعلاء الدين حيث وصلت ادارة المريخ لقناعة ان موضوع الشماته والغيظ لنادي الهلال لم تؤتي اكلها مع المستويات الضعيفة التي يقدمها اللاعبين - مش ملاحظين حكاية الجيوب الانفيه كترت ومسخت

ود عبد الماجد :

احلي ما قرأت لود عبد الماجد قوله

< بعدين المدرب اتوفيستر دا ما عاوز ليه مساعد مدرب.

< عشان نكون واضحين معاكم ..دا عاوز ليه مساعد طبي.

< زولكم كبير في السن ..بحتاج للرعايه الطبية.

بصراحه :

نجح جمال الوالي في تعاقداته مع المحترفين - ففي اجتماعه الاخير قرر خفض رواتب المحترفين مما دفع بكروجر بطلب انهاء التعاقد - عقود المحترفين يجب ان تصاغ بطريقه صحيحه علي ان تضمن شروطا جزائيه علي المحترفين حتي يضمن النادي حقوقه - في الهلال مازالت العقود تفتقد الصياغة الصحيحه ومازلنا في الهلال ندفع الاثمان الغاليه لاخطاء ارتكبها رؤساء الهلال السابقين مع هوت وديمبا وكامبوس وايفوسا وغرزيتو وووووووو

المعز ديدا وينك :

نفتقد كثيرا حارس الهلال الامين المعز محجوب فالنابي بالغ عديل وهو يبقي هذا المعز في دكة الاحتياط - بطولات افريقيا لا يصلح فيها سوي المعز مع حبنا وتقديرنا لجمعه جينارو - هل سيواصل جمعه حراسة العرين حتي في افريقيا كان يجب علي النابي ان يجهز المعز مبكرا



محمد حسن شوربجي