ديون البرير ممكن كذا . مليون
ديون الارباب ممكن كذا . مليون
ديون الحاج عطا المنان القادمه ممكن كذا .مليون
ديون طه علي البشير كذا . مليون
الهلال مديون لكل رؤساء الهلال بكذا .. مليون
والهلال اكيد مكبل بديون كل اقطابه
ودخل في الخط صابر الخندقاوي
وهذا يعني ان الهلال اصبح اسيرا لهؤلاء الاقطاب
وفي يوم رفع البرير صوته عاليا ومطالبا بديونه الهلاليه
وفي يوم طالب الارباب بديونه الهلاليه وقروشي قروشي
وممكن يوم عطا المنان يشتكينا في الفيفا
في يوم كان الارباب ممسك بكل مقاليد الهلال
والبرير كان حاكم عام للهلال
والبرير كان بيجمع ايجارات الدكاكين بنفسه
وكان الاثنان بيدهما مفاتيح خزائن الهلال
واي قرش داخل او طالع كانوا بيعرفوا عنه
يعني الديون دي كانت غير معروفه للعيان
وممكن الارباب يقول انها ٥٠٠ مليار
وممكن البرير يقول انها ١٠٠٠ مليار
فلا احد يراجع حسابات الهلال
ويا ويل الادارات التي تتسلم هذه الديون
فقد تظل ضعيفة و اسيرة للدائن
و حال الهلال اشبه بحال السودان
وحال اقطاب الهلال اشبه بحال الدول الدائنه
وانظروا كيف تتلاعب امريكا والدول الدائنه بالسودان
ما ممكن لله في لله الاقطاب يتهافتون علي رئاسة الهلال
انهم يتقاتلون علي اكبر امبراطورية رياضيه في السودان
وقروشي شي شي
وقروشي شي شي
ده المضيع المريخ:
كل طموح اهل المريخ اختطاف كل لاعبي الهلال
وعيون الوالي والمريخ لا تفارق كل لاعبي الهلال
وقد انتقل الكثير من لاعبي الهلال للمريخ
وفي وقت كان نص فريق المريخ من الهلال
حتي ان احد كتاب الهلال طالب بتسمية المريخ ( بالهلال الاحمر )
يعني همبته وخطف عديل ورغبة اكيده في تدمير الهلال
تراوري قعدوا يوسوسوا ليهو لحد ما لبس احمر
مع علمهم انه قد غادر الهلال لتمرده وتغيبه المتواصل عن التمارين
ويقال ان احدا قد قام بتحريضه
وتراوري طلع ضعيف شديد امام الدولارات
وسجلوهو وصفق ليهو لكنه نفس تراوري الكان في الهلال واكعب
وغير هدف في رد بول ما سجل
و المهم عند ناس مزمل والمطبلاتيه ان يحاربوا الهلال في لعيبته
وهم الان يصورون تراوري بالزووم
وحسع الوالي حيخصم عليهم نص المرتب
لانهم وحين كان الوغي وادغال افريقيا تضاءلوا
وكان التراوري قدام ناس يوغندا صفر علي الشمال
ووحده جنرال الهلال الثاقبه هي من كشفته وجعلته جلوسا في دكة الاحتياط
قد لا يهم اهل المريخ كثيرا لماذا غادر تراوري القلعة الزرقاء
والمشكلة انهم قد وقعوا في فخ كتاب الهلال حين صوروا لهم مشكله تراوري علي انها ماديه
وهم يعلمون تماما ان تراوري ما منو فايده
المريخ يا اخوانا شغال بمقولة المرحوم ابو العائله :
لو كديسه نطت سور نادي الهلال ناس المريخ حيجيبوا كديسه مخصوص وينططوها سور المريخ
انهم دوما كالطفل الذي ينظر بلهفه لما في يد الاخرين
الهلال جاب تراوري لازم المريخ يجيبه
والهلال جاب كلاتشي لازم يسجلوا كلاتشي
والهلال جاب ريكارو لازم يدربهم ريكاردو
ومن مجاهد لهيثم طمبل مرورا باكرم والباشا وكلاتشي وعلاء الدين وانتهاء بهيثم
وبكره سيداعب المريخ كوليبالي وسيدي بييه
الهلال مدرسه ولعب وفن وهندسه
والحمد لله فما زال بالهلال نجوم تتلالا
وليد ومحمد عبد الرحمن وسيدي بييه وكوليبالي وسيدي بييه
وبالهلال عمالقه لا تثنيهم الدولارات
وقد قاموا باداء قسم الولاء للهلال وبكل حب واخلاص
تحيه لكاريكا المزيكا وتحية لسيفنا الضاوي
وتحيه لكل اقمار الهلال
وتعظيم سلام لمدرسة الهلال التي يتعلم منها اهل المريخ علي مر التاريخ
وفعلا وكما كتب احدهم فأن جمال الوالى وبواسطة وسيط هو من خطط لتحريض تراوري على التمرد من شهر يونيو الماضى
و قد تم دفع مبالغ له نظير ذلك،
و تمثيلية وفاق سطيف الجزائري و غيرها كانت لزر الرماد على العيون حتى لا تظهر اي شبهة بان تراوري محرض من جمال الوالى
ومن قبل ابعد جمال الوالى قودوين عن الهلال وبنفس اسلوب تراوري سجل كلاتشى للمريخ وسجل هيثم مصطفى بعد تمثلية استقالة الوالى العام الماضى
شعار مريخ الكمبله :
كوليبالي يا جمال الوالي
كمبالا سيتي سيتي كمبالا
محمد حسن شوربجي
