• ×
الجمعة 29 مارس 2024 | 03-28-2024
محمد عبدالماجد

وان طال السفر

محمد عبدالماجد

 0  0  12963
محمد عبدالماجد
وصافة الهنا والقروش !!!

< بعد تبخر حلم المريخاب في الفوز بكأس الدوري الممتاز بعد سلسلة الشكاوى (المكسيكية) التي بدأت من سادومبا وكابوندي (افريقياً)..(لم يجنح احد)، وانتهت بـ الشكوى في عمر بخيت (محليا) ..(لم ينجح احد) ايضا (عرب وامل) ، اتجه المريخاب الي بطولة الفوز بلقب هداف الممتاز.

< حتي اني بيني وبين نفسي (انتوا مالكم)..بتخيل ان الاتحاد العام لكرة القدم السنة دي سوف يغير لوائح بطولة الممتاز هذا العام ليكون بطل الممتاز هذا العام هو الفريق الذي يفوز مهاجمه بلقب هداف الدوري الممتاز.

< علي هذا طبعا تترتب عدة اشياء وهي ان النادي الذي يكون فيه اللاعب الفائز بلقب الهداف هو الكل في الكل وهو الذي يشارك في البطولة الافريقية للابطال كممثل اول للسودان.

< المهم مفروض المريخاب ديل يقعدوا يتحاسبوا علي (وصافة) هذا العام...ما يقعدوا يعملوها لينا كلها (جزائر ومصر) الكورة دي انتهت وبقينا علي (وصافتكم) دي.

< الكورة بتنتهي والعلاقات المصرية الجزائرية بترجع ...لكن انتوا (وصافتكم) دي بتروح وين؟.

< قالوا ليك واحد عندو (صلعة) كبيرة ...مشي للاستديو عشان يتصور.

< الزول اول ما قعد عشان يتصور قال للمصور ...حاول تأخذ لي صورة..لكن بشرط (الصلعة) ما تظهر فيها.

< المصور عاين للصلعة كدا ...وقال ليه: (الاّ اصورك من الرقبة ولي تحت).

< المريخاب هسع بعملوا نفس الشيء....عاوزين (الوصافة) ما تظهر.

< عملوها لينا كلها (مصر والجزائر).

< انت يا سلك فردوس عبدالحميد زعلانة من (نجيلتكم) ليه؟.

< واحمد بدير مالو المباراة كلها واقف.

< احمد بدير مسكين (العطش) نشف ريقو.

< وهالة صدقي قالوا قالت المباراة ما شافت فيها اي حاجة (الاضاءة) كعبة.

< وصافتكم دي بي استادكم دا ما بتتبلع.

< انا ما عارفكم بتبلعوا الطابق التاني كيف؟.

< مفروض تقعدوا تتحاسبوا.

< المحاسبة ما فيها اي حاجة...الاخوان في البيت بتحاسبو.

< معقولة (وصافة) تخسروا فيها كدا.

< والله نحن ناس عمر بخيت وهيثم مصطفي وكاريكا وامبيلي ديل يجيبوا لينا (وصافة) زي وصافتكم دي ...نجيلة ما نلبعهم فيها.

< نجيلة شنو؟.

< يمين كنا نلبعهم في (رملة) وفيها (حصحاص) كمان.

< نحن بنلعب كمان.

< معقول نشجع لينا فريق ...خمس سنين وصافة.

< خمس سنين دي محمد الامين في (الحب) ما صبر عليها...انتوا ما عارفكم بتصبروا عليها في (الوصافة) كيف؟.

< يا اخي (وصافتكم) دي (المظلة) ما صبرت عليها.

< عشان كدا قالوا (المظلة) بطير.

< مسكين قال ليهم : (مظلتكم دي لو ربطوها بي سلاسل ما بتقعد ليكم).

< مع ناس موسي الزومة والسعودي وبلة جابر ليها حق ما تقعد.

< قالوا ناس همد ما ركبوا (المظلة) عشان خايفنها تطير.

< الجماعة قالوا يمكن تطير تمشي الهلال.

< بعد باكمبا وادوارد وحمودة وعلاءاالدين يوسف ..بقي ما عندهم ثقة في (المظلة).

< المظلة عيشتها تطير.

< انا ما عارف انتوا (الوصافة) دي بتتعبوا فيها كدا ليه؟.

< وصافة غالية بي شكل.

< انتوا عارفين نحن وصافتكم دي بي (التجاني ابوسن) ممكن نجيبها.

< يعني ما عاوزة ليها (جمال) ولا عاوزة ليها (والي).

< نفسكم قايم في الفاضي.

< هسع دي عاوزة ليها (طابق تاني).

< جرايد واعلام ومعسكرات خارجية و..و...و...

< دا كل عشان شنو؟.

< عشان الوصافة.

< هسع الوصافة عاوزة التعب دا كلو.

< انتوا بتتخيلوا ان المريخ في هذا الموسم الذي حقق فيه الوصافة عسكر برة اكثر من 5 معسكرات.

< عشان شنو؟.

< هسع دي عاوزة ليها (معسكر).

< نحن عسكرنا في (نيالا) جبنا البطولة بفارق 10 نقاط.

< لو عسكرنا في (امستردام) كان الفارق بكون كم؟.

< لو عسكرنا في امستردام ...ناس مزمل ابوالقاسم ديل كانوا الي الان بحسبوا في (الفرق).

< اسماعيل حسن طبعا بقعد يغالط.

< مامون ابوشيبة برجع لينا لي سنة 1939عشان يورينا حصل شنو في المباراة التي جمعت بين الهلال والمريخ.

< بالمناسبة الاعلام المصري قالوا قال (الايميل) اتمسح.

< ايميل شنو ما تسألوني.

< بصم ما بصم..بصم مابصم.

< انت من زمن البصمة.

< حصلت حاجات جديدة.

< حصل شنو عليك الله.

< ناس الميرغني.

< ناس الميرغني مالهم؟.

< ناس الميرغني قالوا اشتكوا المريخ ....واتهموا جمال الوالي بمفاوضة فيصل موسي.

< انتوا ...انتوا ما غريبة عليكم.

< بتفاوضوا في فيصل موسي قبل المباراة مالكم.

< خايفين الفرق يبقي 13 نقطة.

< يعني شنو لو بقي... الـ 10 نقاط ...زي الـ 13 نقطة.

< قلت ليكم (الوصافة) دي ما محتاجة للتعب دا.

< مؤتمرات صحفية ...ومعسكرات وجرايد ...ومفاوضات قبل المباراة..وطابق تاني ووارغو.

< بس اقيف لي قبلك..وارغو دا قصتو براهو قصة.

< زول مسجلنو بي 3 مليون دولار ....عشان في النهاية يجيب ليكم (الوصافة).

< ويا ريت الوصافة لو جابها بي فرق صغير ...نقطة..نقطتين ...تلاتة ..لي خمسة نقاط ...كان ممكن نقبلها منكم.

< لكن الفرق يبقي 10 نقاط و40 جلدة ... تبقي الوصافة لا مقبولة ولا بتبلع.

< اغشكم يعني.

< وارغو دا بذكرني الزول الجابوه من الخلا عشان يضرب التمساح ويكتلو.

< قال لي ناس الحلة : التمساح دا خلوه لي ..وروينا ليهو وانتوا ابعدوا لي منو؟.

< صاحبكم وقت شاف التمساح ...عيونو طلعن في ايدو...قال لي ناس الحلة التمساح دا وقت توروني ليهو ...وصلوني ليهو...عشان كرعيني ما شايلاني.

< شالوه وودوه علي التمساح ...وقت شاف التمساح كويس...قلبو رجف ..بقي زي (الحمامة).

< وقت قرب علي التمساح قال ليهم التمساح دا اضربو لي واكتلوه ...وابعدوا لي منو؟.

< الجماعة وقت كتلو ليهو التمساح...قال ليهم : ودوه المشرحة عشان قلبي يطمئن...يمكن يكون ما مات.

< ودوا التمساح المشرحة.. بعد زولكم ما اتأكد من ان التمساح مات قال ليهم: جيبوا لي موية ...الواحد نفسو اتقطع.

< شرب الموية وقال ليهم : اها بعد كدا انا امشي عشان عندي (فهد) عاوز اخلص عليهو بعد تمساحكم دا.

< واحد من ناس الحلة قال ليهو : لو الفهد ح تتخلص منو بي نفس الطريقة التي اتخلصت بيها من (الفهد) ..يبقي ما تخسر الناس (جك موية) ساكت.

< هسع وارغو شغال بي نفس النظرية.

< وارغو براه.

< كلتشي جابوه فزع بقي وجع ..شغال ببحث عن بطولة شخصية ليه.

< وريتشارد...وطمبل ومجاهد واكرم والباشا.

< والفرق عشر نقاط.

< وصافتكم دي مكلفة بي شكل.

< هسع دي عاوزة ليها (وارغو).

< دي بي بلة جابر ممكن تحققوها.

< عشان كدا مفروض تقولوا لي (لاسانا) شكرا وتقولوا لي (كلتشي) شكرا وتقولوا لي (وارغو) شكرا ..وتقولوا لي (ايداهور) شكرا وتقولوا لي (الدافي) شكرا..امشوا لي بلدكم وقت يكون عندنا طموح عشان نحقق بطولة الممتاز ..بنضرب ليكم.

< خلوا تلفوناتكم فاتحة...لو احتجنا ليكم بنرجع ليكم.

< ما في داعي تصرفوا ليكم دولارات في الفاضي ساكت ...عشان في نهاية الموسم تقعدوا تتنافسوا علي (لقب) هداف الدوري الممتاز.

< الموضوع دا ناس عبدالحميد السعودي يمكن يحسموا ليكم.

< الموضوع ما بستاهل ولا بحتاج.

< ملحوظة: غايتو عندكم جنس صبر.

هوامش

< جمال الوالي طبعا عادي عندو يفاوض اللاعب قبل المباراة.

< الغرابة في ذلك في شنو؟.

< الحاجة الجديدة هي تصعيد مجلس ادارة نادي الميرغني للموضوع.

< عشان كدا الناس استغربو.

< لو ما موضوع المفاوضات دا الفارق كان بكون 18 نقطة.

< مباراة المريخ والشمالي في عطبرة ...اتوقع ان يفاوض مجلس ادارة نادي المريخ لاعب الشمالي عطبرة (احمد يكيني).

< ناس المريخ ديل لو لعبوا مع فريق درجة ثلاثة بفاوضوا ليهم احد لاعبي الفريق الذي سوف يتبارون معه.

< كشف المريخ واضح انو كلو مهدد بالشطب.

< كل سنة يشطبوا ويسجلوا ...وما بلقوا حاجة غير (الوصافة).

< الشمالي دا عندو 11 نقطة وبرضو عندو فرصة يقعد في الممتاز.

< مفروض الشمالي ينزل مباشرة ...عشان هبوط الاتحاد مدني او هلال كادوقلي فيه ظلم.

< عودة التاكا كسلا للدوري الممتاز سوف تضيف الكثير للدوري.

< في الهلال تصعيد بركية ومنير امبدة والنعيم رونالدينو امر لابد منه.

< اطراف الهلال مراجعة لا بد منها.

< كابوندي احسن حاجة فيه ...انو بوجوده في الهلال لقينا لينا خانة فاضية.

< امبيلي ينبقي ان يستمر مع الهلال وكذلك سادومبا.

< ديمبا طبعا افضل محترف في السودان في هذا الموسم.

< مدافع ومهاجم في وقت واحد.

< بعد كلام هالة صدقي ...(نجيلة) المريخ مهددة بالشطب.

< محمد فؤاد خطف النجومية من (المحمدي) الطرف اليمين للمنتخب المصري في مباراة المنتخب المصري الاخيرة.

< الاهلي المصري يفاوض (هيثم شاكر) للانضمام للفريق.

< خبر عاجل: الوصافة الكتيرة بتعمل تسمم.
قوون
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019