كرة ارضية

راشد حسن طه

دايرين نكتب عن الكورة لكن ناس (المظاهرات) ما بخلونا

* والله يا جماعة انا راجل كورنجى

* زول كورة سااااى

* وما عندى فى (السياسة) اى غرض

* السياسة الوحيدة البعرفها (سياسة) انتقال اللاعبين

* عشان كده بالله اسمحوا لينا نواصل كتاباتنا فى الرياضة بعد ما الفيس بوك بقى كلو (مظاهرات)

* والله هسة الواحد قاعد قدام الكمبيوتر وخايف يجيهو (حجر) ولا (بمبان) ولا (طلقة) طائشة

* طلقة كده زى قون بوى فى الحضرى

* امس لاقانى عبد الجبار

* جارنا عبد الجبار جنو (سياسة)

* ولا بتغالط فى السياسة

* الحلة كلها بحلل ليها الاخبار عبد الجبار

* اها امس دقيت ليهو الباب

* الزول اتخلع

* سالنى مالك ؟

* قلت ليهو ( كادوقلى) دى ما قامت فيها (مظاهرات)؟

* وقال لى انت من متين بقيت تتكلم فى السياسة؟

* قلت ليهو سياسة فى عينك يا عبد الجبار

* قال لى طيب انت مالك ومال (كادوقلى) ومظاهراتها

* قلت ليهو اصلو (الهلال) ماشى هناك وعندو مباراة مع هلال كادوقلى

* ولأنو عبد الجبار (شيوعى) وكمان مريخابى (غتيييت) قال لى (كادوقلى ااااامنة)

* الله يجازيك يا عبدو اصلك ما بتطمن

* هسة التلاتة نقاط دى يجيبوها كيف مع ناس عبدو جابر وصالح الامين الفايرين ديل

* وكمان ما تقول نحن شطبناهم

* اها دى فرصتهم فينا

* الله يستر علينا من كادوقلى

* والله كان اجلوها لى تالتة العيد يكون كويس

* انا تانى عبد الجبار ده ما بسألو كلو كلو

* والله لو بقى (محلل فى الجزيرة ) ما بسألو

* زول فقر ونقر

* اصلوا ما بديك خبر سمح

* كلامو كلو ( انفجارات) و(غارات) و(عجز) و( عملية انتحارية)

* بالله التقول عبد الجبار ده والدنو فى استديو اخبار

* الله يغتى علينا من كادوقلى

* ديل لاعبين فى (الخرطوم) مع (الخرطوم)

* الدورى حظوظ

* جايينكم يا اهلنا فى هلال كادوقلى

* ونحن هلال وانتو هلال

* وافتكر ما فى داعى (للياقة) و(البياخة)

* ولحدى هنا كويسين

* (بياخة) ناس (الابيض) دى خلوها وما تعملوها لينا

* ناس (الابيض) ادونا (تلاتة)

* انتو ادونا (التلاتة)

* (التلاتة) (نقاط)