• ×
الإثنين 8 مارس 2021 | 03-06-2021
محمد عمر الامين

شاطئ الريفيرا

محمد عمر الامين

 0  0  7088
محمد عمر الامين
شاطيء الريفيرا

محمد عمر الأمين

تعالوا نشوف الكمونية ضلع

* لاول مرة الواحد يكون مع مباراة طرفها الهلال أو المريخ وقلبو ثابت ومافي اي احساس بأنه الليلة الفريق لاعب مباراة تعتبر في مصاف مباريات القمة التي كانت بالامس تجد حظها من الاعلام سواء المقروء أو المسموع أو المرئي فالحكاية عبارة عن لبن سمك تمر هندي فريقان يعيشان وضعاً يصعب على الكافر.

* هسع الناس بتقول الموردة إتهزمت في اربعة مباريات طيب الهلال ذاتو إتهزم في اربعة مباريات يعني 12 نقطة بالتعادل تعني خسارة اربعة مباريات صحيح الهلال ما خسر داخل الملعب بس خسر بهذا العدد المهول من التعادلات يعني زي ما قلت ليكم الحكاية بايظة للأخر.

* كورة الليلة مفروض لاعبو الموردة يجو الميدان عشان يلعبوها لاجل المتعة يعني الواحد يستلم صاح ويمرر صاح ولو في طريقة يخترق ممكن يخترق فكل الطرق معبدة وصدقوني لو ما صرخنا نحنا في ناس بي هناك ممكن يصرخوا لينا وانا عارفهم كويس ناس عاوزه تشوف الكورة داخل شبكة الهلال والموردة مشكلتها هذا الموسم تبقى في الوصول للشباك ومن هنا تبدأ المعادلة المفروض يتم تعديلها.

* ايوة يا عبدالمجيد المعادلة التي تبحث عنها الموردة بسيطة وسهلة وتقول كورة معكوسة أو تمريرة متقنة أو محاوره ايجابية + تهديفة قوية = تساوي هدفاً داخل شباك اخوتنا ناس ابوالهل.

* بس كمان يا مجيد ما تنسى أنه ناس ابوالهل العايشين حالة احسن منها حالة ناس موقف جاكسون حا يجو عشان يؤكدوا للاتحاد إختيار بطل الدورة الاولى لانهم عارفين ناس معتصم جعفر ديل راسهم قوي يعني ما دام قالوا بطل الدورة الاولى يمثل عربياً أكيد حا يلعبوا عشان يحصلوا المولد وعشان يكونو قريبين لابد وان يكسبو مباراة اليوم ومباراتهم الاخيرة وينتظروا هدية ولو مجانية سواء من عمنا سيد سليم أو محسن سيد وكلو سيد في سيد.

* عشان كده يا مجيد لازم كمان تخت في راسك أنه ناس الهلال ما حا يجو عشان يسلموا المباراة فالكلام الحلو السمعوهو في مباراة الخرطوم ما اظن يفكروا يكرروا سماعه تاني عشان كده لازم تعمل كمان بنظرية (مكر مفر مقبل مدبر معاً كجملود صخر حطه السيل منعل) وعنتر إبن شداد خال كمال لما قال الكلام ده قالوا وهو كان بشاهد في مباراة باير ميونيخ وبرشلونة عشان كده يا مجيد لازم تفتح عيونك لناس (الراية) كويس كفاية الحصل لينا في كورة مريخ الفاشر ناس الراية ديل الواحد بكون في الخط وتفكيره في طوبة يمكن تجييه طايرة من المدرجات عشان كده مسالة يعمل نايم من التسلل دي عادية جداً.

* أها نرجع لكورتنا الليلة قالوا يا ودعة الزول (لما يتخلع بشوف الكمونية ضلع) نحنا عاوزين الليلة نشوف الكمونية ضلع صدقوني نحنا لازم نأكل الكمونية على اساس انها ضلع بحكم غلاء اللحمة خاصة الضان فلحوم الضان بقينا نشوفها معلقة في الجزارات عشان كده الليلة عاوزين نأكل لحم ضان ونحلي ببرتكان عشان نسافر شندي وعطبرة انشاء الله بي (نيسان) ما مهم ما دام اكلنا لحم الضان.

* تعالوا يا شباب الليلة لكورة الهلال وادخلوا الميدان بدري واجروا بي جاي وبي جاي واعملوا تسخينتكم عادي فالحكاية ما صعبة صدقوني حا تلقوا الاستاد (خلا) لو رفعتوا اياديكم لجماهير المدرجات الا تصفق ليكم وتحييكم (الدعايات الاعلانية) ولو حييتو ناس المقصورة احتمال يرفع ليكم يدو (مصور قناة النيلين) ولو رفع ليكم يدو اي واحد من ناس جلاليب المقصورة فتأكدوا بانه دمباوي او السر بخيت يالفريق بحر (وزاد البحر والقرقور ظهر) يعني الليلة الميدان ميدانكم والملعب كلو حقكم أما لو اتجهتوا للمساطب الجنوبية فحا تلقوا ناس الجزولي منتظركم (بالليلة جينا) يعني الحكاية بسيطة جداً كلها تسعين دقيقة وناس جده يضربوا يقولوا لينا الكورة انتهت على شنو؟

* الموردة والهلال الليلة باستاد الهلال هذا هو العنوان أما ما يجري بداخل الميدان فعبارة عن بطيخة مقفولة قد تطلع حمراء للموردة أو للهلال أو بيضاء على الفريقان بس كل ما نتمناه أن تطلع حمراء في اداء سهرة رياضية ممتعة يقدم من خلالها الفريقان مباراة تعيدنا ولو قليلاً لايام الزمن الجميل فالحكاية لا عاوزة شد اعصاب ولا تلفان صمامات قلوب ولا حتى زعل الحكاية بسيطة الخاسر عليه بتقبل الخسارة حتى ولو كانت المرة الاولى له.

سندة شاطئية

* تعادل الريال ففازت برشلونة بالدوري حتى قبل ان تلعب فهل ستفوز الموردة لتهدي الخرطوم بطاقة العرب قبل أن تلعب؟

* هسع واحد ينط ليك ويقول ليك شن جاب الموردة والهلال والخرطوم للريال والبارسا.

* اهو كلام ما دام هناك من يرى الكمونية ضلع.
امسح للحصول على الرابط
بواسطة : محمد عمر الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019