• ×
الخميس 28 مارس 2024 | 03-27-2024
الواثق عبدالرحمن

همس الهتاف

الواثق عبدالرحمن

 2  0  1285
الواثق عبدالرحمن
البحث عن امل
+ يبدو ان الحال في وسطنا الرياضي سيمضي هكذا...بذات الغباش والطناش...ناس فوق مراتبا بتتعلى..... وناس ليها الله ...... وعيشة الحكام .
+ مات ايداهور...حزنا جميعاً مريخاب..وهلالاب...ومورداب...وناس ما عندهم أي علاقة بالكورة .
+ لم ننس تفويت الحدث...صحف يسترق مصوريها للجنازة لقطات بالموبايل..وحال مايل..وصحف استغلت مشاعر الناس... السايلة بالاحساس ..وساسة لم تفوتهم الحفلة .
+ وسدرت التلفزة باتجاه نادي المريخ والمطار وسرادق العزاء...استضافات وفلاشات...اداريون واطباء اختصاصيون ...تنظير في تنظير .
+ كل هذا والامل غائب ومغيب .
+ الامل النادي.... الكيان الكبير...مرسال عطبرة..مرسال الشوق من ارض الحديد والنار...والبسالة ...فخامة صوت العطبراوي...هدير القطارات....وبساطة الزول السوداني .
+ وغاب ايضاً الامل...الامل في اصلاح حالنا المائل...الامل في الموضوعية...الامل في الانصاف...والعقلانية...واعمال قواعد الضمير النابه .
+ التلفزيون السوداني (برضاه) ركز على وفاة ايداهور...لم ينسى حتى هدفه في شباك ابوبكر الشريف بما ينطوي عليه الامر من مخاتلة وشغل تحت تحت...لم ينس اعادة توثيق الحادثة...لم ينس استضافة احد رجالات النادي الكبير...لكنه نسى .
+ النيل الازرق لم يفوتها المهرجان...ميرفت نصبت شراك برنامجها وحلقتين من النوع ابوكديس...واحدة توثق للرحيل والثانية جابت ليها دكاترة واسعافات ووحدات طبية ...وتغذية كمان...التقول الممتاز ده قصوا شريطوا الليلة دي .
+ ميرفت اجتهدت...الاخراج سليم...والخبز حار...والمخبز تركي...لكنها...وقناتها من خلفها...نست ايضاً .
+ كلهم نسوا...او لعلهم تناسوا...نسوا ان الكرة يتنازل فيها فريقان...وان المريخ لم يكن وحده...نسوا الامل العطبراوي...الذي تناوشت ابناؤه الاحزان والقلق والرهبة..ما بين التاثر مثلهم مثل لاعبي المريخ بفقد زميل عزيز..ما بين الخوف من ارهاب الفريق و( الفريق) امين مجلس شورى المريخ ..وجماهير متفلتة متأهبة للفتك باولاد عطبرة .
+ كل ذنب اولاد عطبرة تمثل في ان ارادة المولى اختارت روح ايداهور وهو اجل مسطور ومحتوم...لا تأخره عربة اسعاف..ولا تؤجله نظريات التدخل الطبي .
+ اولاد امل عطبرة عاشوا الرعب الحقيقي...قرأت العديد من روايات الرعب وحضرت افلام العنف والخيال ...لكنني ما رايت تجسيداً للخوف والرهبة والعنف والتربص كما حدث من جمهور المريخ الذي تقدمه الجنرال للفتك بابناء عطبرة .
+ الله لطف ...والله سلم...ولولا عناية المولى ...وزخات الغاز المسيل للدموع وتدخل الشرطة لحلت كارثة كبرى بابناء عطبرة المساكين .
+ برغم هذا كله نسي رضا ونسيت ميرفت...نسي قطاع الرياضة ...نسوا جميعاً البحث عن اولاد الامل...نسوا جميعاً استنطاقهم عن ساعة الزلزلة والرعب السخيم...نسوا ان يطمئنوا عليهم.... ان يزوروهم...وكأنما قدر الكاميرات ان تبقى في الخرطوم مع الكبار .
+ النيل الازرق عملت بالمثل الشعبي اضان (الناقل) طرشاء...اما رضا فقد رضا بان يستضيف قريش ...ليحلل ويهاجم...ويستغل الفاجعة كاحسن ما يكون لضمان (فوزات) قادمة للمريخ بعد ان فشل (اب رمشة) الاب ..واستنجد بابنه لعل وعسى ...رضا رضى بأن يستضيف رئيس الامل من على البعد بالتلفون...وقديماً قالت الاعراب.... ضرب التلفون نصف المشاهدة .
+ لا نملك في ظل هذه التكويعات والخرمجات الا ان نبتهل للمولى العزيز الجبار ان يبسط العدل في صدور القائمين على رياضتنا وصحافتنا وشاشاتنا ....نساله التوفيق والهداية وسبل الرشاد...وسنظل نبحث عن امل .
هتاف اخير
هل عرفتم الآن لماذا ترك الناس مدنهم المخضرة وقراهم الفسيحة بأنسها البريء وسمرها الطاعم وروح الاهل وزغاريدهم وعرضاتهم...هلا عرفتم الآن لماذا تكوم اكثر من ثمانية مليون سوداني في الخرطوم...وتركوا (الامل) بما حمل ،،،،،

امسح للحصول على الرابط
بواسطة : الواثق عبدالرحمن
 2  0
التعليقات ( 2 )
الترتيب بـ
الأحدث
الأقدم
الملائم
  • #1
    ابوالمجد 03-14-2010 10:0
    كنت اتمنى ان تكون كتاباتك بقدر سنك ولكن لم اجد غير الفتن---- حينما رحل الغالي والي الدين رحمه الله وبثت حلقة عالم الرياضة اهدافه في المريخ زاد دلك حزننا على رحيله لايماننا بموهبته وتمنينا لو انه سجل اكثر واكثر ليضاف لسيرته العطرة---- لعلمك فان البرنامج لم يبث هدف ايداهور من ضربة ثابتة في شباك المعز محجوب واخشى ان يكون دلك متعمدا---
  • #2
    الاحمر الوهاج 03-14-2010 07:0


    والله العظيم انت خساره الواحد يضيع وقت في قراءة مقالك او الرد عليك !!


    امل شنو ومريخ شنو ؟؟؟؟؟؟

    في زول ماااااااااااااات ،

    الناس دي بتتكلم في موت زول ،

    روح فارقت الحياه ،

    وانت جايي تفلقنا بي امل ومريخ ؟؟؟؟؟
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019