• ×
الأحد 7 مارس 2021 | 03-05-2021
الواثق عبدالرحمن

همس الهتاف

الواثق عبدالرحمن

 0  0  12623
الواثق عبدالرحمن
همس الهتاف
حدث في السودان
نحن بلد مختلف..شعب غريب الاطوار...محنة وطيبة زايدة...وتعانف بغيض .
ظواهر كونية غريبة نتميز بها دون غيرنا .
مقابر فاروق واحمد شرفي في قلب المناطق الراقية...الاموات في المكان الخطأ...والاحياء تتلقفهم منافي الوادي الاخضر والحارة كم وكمين .
في السياسة والكورة ....نتفرد باشياء لايمكن ان تحدث في العالم المعاصر .
وزير يقرر براهو زيادة سلعة...لا برلمان لا مجلس وزراء...ولا نقاش...يحتقب قراره من البيت ثم يمضي الى وزارته ...والتسعيرة ترتفع..ثم تهبط تاني يوم .
في الكورة احداث اغرب واعجب .
القاسم المشترك مريخ السودان...الوصيف الدائم .
ذات سيكافا من السيكافات ..دفن لاعب سيمبا المدعو مدراكا...والذي هتفت له جماهير الاحمر..الله يازاكا..دفن هدفاص قاتلاً في الشباك الحمراء معلنا خروج الوصيف من البطولة فعم الهياج المدرجات..وسادت شريعة الغاب...وتعرض صحفي تنزاني للقتل في واحدة من اشبع الاحداث الدموية النادرة في ملاعبنا...ثم فوجئنا من غدنا باعادة المباراة...مهر القرار الطيب عبد الرحمن...الواحد ده.... باعتباره سكرتير اللجنة انذاك...فانسحب هلال الحق والعدالة..ثم كان التتويج الحرام .
اها دي واحدة من البتاعات المحمولة براً .
واول الامس حدثت قصة اغرب من الخيال .
يا خدي لو حكوها ليك بكل لغات العالم اصلها ما بتتبلع .
المريخ نيل الحصاحيصا في مباراة (تنافسية) في الممتاز .
جماهير المريخ في انفلاتها المعهود شتمت ابراهومة وريكاردو شتيمة الارازل .
شتيمة تصم منها آذانك..وتسأل الله ان يعفي من مثيلاتها اولادك .
وطفقت هذه الجماهير نفسها تصفق لمدرب الفرقة المنافسة .
صفقت جماهير المريخ لفاروق جبرة مدرب النيل .
جبرة كان يدرب النيل على الخط...في نفس الوقت الذي انهى فيه اتفاقه مع الوالي لتدريب المريخ .
دي موش زي حكاية كلاتشي ...اللعب معانا...وكان قابض منهم .
والحضري الذي مرمط سمعتهم كان هو الآخر في الملعب...والفدائي اكرم في الكنبة ..قلنا ليكم مثل هذا لا يحدث الا هنا....و حقوق الطبع محفوظة

زي ده لاقاكم قبال كده ....سمعتو بيهو...غايتو يطرشنا .
النيل الحصاحيصا ده موش نيل معتصم والجاكومي .
النيل الاذانا بالجماعة اياهم الاستلمو مقاليد الحكم الرياضي في قلب العاصمة وضيعونا ....انقلاب جهوي عديييييييييييييل كده .
ولولا النابه النبيه مالك بن جعفر...كنا قلنا الحصاحيصا دي ماللا معانا .
الغريبة الحصاحيصا دي غالبيتها هلالاب .
بس نحن حظنا كده .
خلونا في قصتنا ..جماهير المريخ شتمت مدربها وصفقت لمدرب الفرقة المنافسة...وطبعا جبرة ما قصر...ابتلع ثلاثية غريبة التفاصيل..في مسرحية سيئة الحبك..قميئة الاخراج .
الحكاية ما خلصت ...
المريخ يقرر مبادلة لاعبه امير كمال المصاب بحسن كرنقو ...سميها اعارة..عوارة..اي حاجة...المهم ده الحا يحصل .
طبعاً برضو صنع خصيصاً للسودان ....فرقة منافسة تستقبل لاعبا مصاباً في مستودع كشفها..وتمنح احد منافسيها الكبار لاعباً في قمة عطائه .
بالله موش فوضى .
قصصكم غرييييييييييييييبة
هتاف الهمس
غارزيتو ده مالو
ريكاردو عاداه والا شنو
غارزيتو صرح بان فرقة جزيرة الفيل لعبت بطريقة دفاعية...ده اسمو كلام .
ده ما زي ريكاردو الفاشل الذي ادعى ان الرباطة كوستي تخندقت .
الخندقة على فكرة فن خططي مجيد .
الانتر قلع الكاس من برشلونة خندقة ساااااااااااااااااي .
في اخطر من مورينهو..خندقاوي محترم .
الفرقة المنافسة تعمل ما بدا لها ...وانت تتصرف خططيا وتكنيكياً..امال جايبنك لي شنو .
كلام عجيب وغير مهضوم .
وغارزيتو قفل التمارين من الجماهير واعتذر للاعلام ...الى لقاء النمور في شندي
الحكاية دي حمالة اوجه .
عملياً (القفلة) صحيحة من اجل التفكير والرزانة الخططية المطلوبتين .
من زاوية تانية اللاعب السوداني ضعيف البنيان النفسي...ولا يندفع في العطاء بحماسة الا بشحن معنوي ....شريحة طاقة عديل كده .
المهم لازم مراجعة ايجابيات القرار وسلبياته مع الكوتش .
موضوع البرنس ده حا ينتهي متين .
ود اللمين مرق بي هنا وبت الصادق ومعتصم حلوا في رحاب الحبيبة .
الحبيبة جاذبة يا ود اللمين ..لعبة كراسي عديل .
حبيب البلد حقتنا رغم انف الرشيد وجنونه الذي نعرف .
تناضل من داخل الصحيفة وتجاهر بحقوقك وتناضل ضد الرشيد .
في التلفزيون قال عبد الله دفع الله في صراحة معهودة انه تحول الى ناشر لان التوزيع محارب من جهات كتيرة .
اها الرشيد ده شرحوا..تحول لناشر عندما هجمته الهجائم .
ما بنمرق نخليها.....سويناها سوا .
البمرق من دارو بنقل مقدارو .
الولاء سيقى رغم انف البنكنوت..والمعايش الغلابة .
هتاف اخير
اترشدي
امسح للحصول على الرابط
بواسطة : الواثق عبدالرحمن
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019