• ×
الخميس 28 مارس 2024 | 03-27-2024
ناجي الطيب

ليس بعد

ناجي الطيب

 0  0  12534
ناجي الطيب
أقطع يدي .. لو ما الوالي ( شتت ) قبل ما الخريف يقيف !!!

طبعآ الأيام دي الناس كلها ما عندها سيره غير الملف الأمني الخاص بي مباراة الهلال وسيركل المالي في أرض الأخير عشان البلد في حاله إضطرابات وكده بعد الإنقلاب العسكري الحصل في حلة ناس ديمبا القال عليه مدرب سيركل الود عايز إنتحر ورتب أموراتوا مع ناس الوصيف وح يظهر في التسجيلات الجايه .. ما علينا الفي راسو يعرف خلاصو وديمبا ده أصبر خليهو بكره الأيام بتوريهو .
الهلالاب ناس مشهورين بالحسم .. عشان كده نجضوا شغلتم بدري بدري مع سيركل وما أحتاجوا حتي مساعدة البدري حق الجماعه .. المهم والله أنا عاجبني شديد التفاعل من جمهور سيد البلد مع قضية مباراة الرد في باماكو وسط الظروف الحاليه .. وشوف عليك الله الناس ديل أولاد حلال كيف .. ناس بالهبل قالوا ستين يمين ما بنعرض أرواح أولادنا للخطر بتأهل لا يسمن ولا يغني من جوع ..
وووين ؟؟؟ كنفدراليه ؟؟؟ تغور البطوله مع الزول الفكر فيها كان حي ولا ميت .. أصلآ المنافسه دي ما بتشبهنا أنحنا أصلآ من الأبطال وإنت طالع يا عمك.
أها كنت بقول في شنو ؟؟ آي إتذكرت .. هسي الناس بقولوا مالي فيها إضطرابات .. علي الطلاق أم درمان دي فيها حي أخطر من مالي زاتوا والأوضاع الأمنيه فيهو تحت الصفر .. طبعآ عايزين تعرفوا إسم الحي .. هو داير ليهو درس عصر ما حي العرضه جنوب .. كدي دايرين لينا واحدآ جعلي كده يعمل تجربه بعد المغرب مباشرة إمشي جنب إستاد المريخ وإختار أكبر كوم من الجماعه ديل تلقاهم سخانه يا غانا لسه شغالين في الباشا وريكو وإبرا ويس وباسكال وسفاري .. يلا إنت بس ما تقول أي حاجه .. ولا تسلم عليهم أصلوا الناس دي تعبانه شديد .. يلا إنت بس غني الأغنيه بتاعة نانسي عجرم والقروب في كأس العالم في جنوب إفريقيا .. ترم ترررم .. أوووو أووو.. أوو .. وشوف بعد داك البحصل ليك شنو.. طلاق تلاته الناس بتصلي في العشا وإنت تكون في الإنعاش .. تقول لي مالي .. ومالو.
آها غايتو يا وصيفاب .. الدوري طااااااااار بعد فارق الأربعه نقاط .. والكنفدراليه أملكم فيها للودار سااااااااااار .. وسيكافا صعبه مع الأحوال الإقتصاديه دي .. ما فضل غير كأس السودان .. ودي بالذات تخصص ساسا قبل ما يودعنا.. أو إحلكم إتحاد معتصم ويلغيها لأنو إنتو أصلآ مشفرين بعد هروب السنه الفاتت والعقوبات المترتبه علي ذلك .. وفي الحالتين سنتكم دي سنة رمااااااده ساكت.
أها يا أخوانا أني بقطع يدي اليمين .. وبلحس كوعي في اليد الشمال لو ما جمال الوالي ده ( شتت) قبل ما خريف السنه دي يقيف.

غارزيتو والبرنس

في بلدنا دي البشر بتصدق أي خبر بسرعه .. وبعد داك بحصل التسرع من دون ما نستوثق من صحة الخبر .. أها أمس قالت جريدة الموج الأزرق علي لسان واحد صاحب غارزيتو .. إنو الخواجه قال : رجعة هيثم خربت عليهو النظام في الهلال .. وإنوا يتعرض لضغوط إداريه وجماهيريه عشان إلعبوا .. وإنوا في مالي ح يكون بره حساباتوا .. يلا بعد داك الناس تعجبك .. ناس قاعده علي الهبشه .. مضادات أرضيه إشتغلت أخطر من المضادات السوريه الوقعت طائرة الأتراك قبل أيام .. وهاك يا نبز .. واحد قال غارزيتو يرجع بيتو .. التاني قال ح يزعزع الهجوم .. وكلام كتير خالص .. وفجأة يظهر الفرنسي ويقول : هيثم كابتن الفريق.. أضحي مؤهل للدفاع عن شعار الأسياد .. وأنا ما قلت حرف من الإتكتب ده وح أقاضي الصحيفه بواسطة السفاره الفرنسيه .. طيب كده كيف ؟؟ تعتذروا للخواجه ولا ح تعملوا شنو ؟؟ غايتو جنس إستعجال.

السطر الأخير

أنا لو في محل الباشا ده .. بشرد من البلد دي وأخلي الوصيفاب ديل بنيرانهم إكتووا براهم .

وألقاكم
امسح للحصول على الرابط
بواسطة : ناجي الطيب
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019