• ×
الجمعة 29 مارس 2024 | 03-28-2024

بمناسبة..صعود..مريخ..كوستى..للممتاز

بمناسبة..صعود..مريخ..كوستى..للممتاز
المجمر مكاوي ابداعات...شاعر..المريخ..
العطاعلى..العكا..بمناسبة..صعود.مريخ..كوستى
للممتاز..رغم..,ظلم..الاتحاد..العام..بقرار
سياسى..وكانت..اكبر..فضيحة..رياضية..
وكشفت..الكثير
اوبريت سودان المريخ
العطا على العطا - البركل
--------------

المريخ
مدى الازمان
ووين ماكان
وكيف ماكان
كتاب تاريخ
واسم وعنوان
شعارو من اشرف الالوان
كاسياهو النجوم بالضو
وبى ضو النجوم مزدان
عظمة وهيبة فى الاحمر
وفى الاصفر جمال فتان
المريخ .. عز العز
وجالب العزة للسودان
المريخ .. كان فى كوستى
او فى فاشر السلطان
كان فى كسلا
او فى كرمه او فى كريمة
او فى البقعه فى ام درمان
المريخ
فى اى محل واى مكان
ووين ماكان
بينات الصحارى الصى
بشاير خير على الوديان
نسائمو تهب شتاء وخريف
على الحلال قبول ورضاء
ويقين ويقان
المريخ ووين ماكان
تمامة كيف
وامانى يكيف الزول كيف
المريخ محل تشريف
فى كل المدن والريف
ومحل يلقى احترامو الضيف
المريخ محل اشراف
ودار للبر والاحسان
حاشا وكلا دون تزوير
ودون تزييف
ودون بهتان
المريخ بطل افريقى ماهو وصيف
وفى التصنيف
عندو بطولة زى الاهلى
زى مازيمبى
زيو وزى وفاق سطيف
المريخ عالمى جوى
وفى كل البلاد معروف
وعندو اسم .. واسم رنان
حد ماصال وحد ماجال
ولادو رجال اسود فرسان
حمرة عين يدشرو الدم
يمرقو عرق عيان وبيان
المريخ فن وابداع
لا بيبيع ولاب يتباع
ومما قام عزيز وشجاع
عين بالعين وسن بالسن
وصاع بالصاع
لاهو ضعيف ولاهو جبان
لا مسنود باى لجان
ولا تحكيم ولا تنجيم
ولا شغل الدجل والجان
المريخ اذا غالب
واذا خسران
نتائجو يحدده الميدان
وده الخلاهو دائما فوق
وفوق للفوق وفى الوجدان
المريخ ووين ماكان
وراهو رموز
وخلفو اقطاب بنوهو كيان
احفاد سيده اهل شاخور
يقدلوا عظمة فى طابور
وبكل الفخر والعرفان
حاج مكاوى حميده
قائد القافله والقبطان
وكان يا كان وياما كان
وفى المريخ معاهو رجال
معاهو اخوان
منيب والتاج شيوخ وعمد
على هامة البلد تيجان
وناس الطيب الجزار
مشير وفريق
ولواء اركانحرب فى المريخ
شوية عليهو
حادى الركب والربان
ناس جملوون والطاهر
الساده الكرام وابرار
ناس البيت واهل الدار
واسياد حق واصحاب شان
اهل الخير..
اهل الجيلى عبد الخير
الكان يمسح الاحزان
الولد البشوش وصبوح
الفال الحسن دحدوح
الولد ال يسل الروح
ومما قام شقى وفنان
قدل خوجل ومشى اتبختر
على درب الخليفة عمر
ولد احمد حسين الكان
رمانة الوسط والنص
فى ايدو السنجه والميزان
طوال عهدو الزعيم غالب
ويكون كسبان
سماحة العرض اذا اتعادل
واذا خسران
زمن ناس انور الشبال
لاحافز ولا اموال
اخلاص للشعار والتيم
زمن كان اللعب مجان
وضحية الكان اسم رنان
عصرا ضو يجيب القون
قبل ماياذن الاذان
زمن ناس زيكو والبنى
والمريخ فى امن وامان
و المريخ مدى الازمان
كتاب تاريخ واسم وعنوان
وفى اى زمان واى مكان
عز العز
وجالب العزة للسودان
وفى كل البلد من جم
عرض وطول
اقدل وطوف
وعاين وشوف
فى ايها زول
من تلقاهو زولا قدوه
زولا صفوه
زول انسان
اعرف انو مريخابى
وزول مشهور
زولا من سلاله الملكه
سيده فرح
فيهو سما ت اهل شاخور
زول قدامى زول عنوان
زولا عمو حاج مكاوى
وخالو الحاج حسن عثمان
زولا اهلو حسب ونسب
وفى المريخ مقام ورتب
ال حجوج وحسن الصاقعة
وعصام الحاج وناس دلدوم
ناس ابوجنه
وود الياس وود التوم
والمرحوم
حكيم الحكماء شيخنا حسن
الكان بالزعيم مهموم
وازهرى .. فتحى ..
ناس عبد الله والاقطاب والاعيان
وكتار وكتااار ومن دون فرز
شيوخ وعمد
واسياد البلد والقوم
ومن ابو العائله
لا عن ناس جمال الوالى
وفى المريخ

كل الناس لي اهل
ولى اخوان
والمو عمى لى انا خالى
وياما ياما فى المريخ
عندى اعمام ولى خيلان
وكل اهل الشعر والفن
ومن زمن الحقيبة البدرى
لى زمن الغناء العصرى
حرم النور وانصاف مدنى
ناس الحوت وناس النصرى
واحمد الله من ولدونى مريخابى
والفن فى دواخلى بيسرى
شلت من الزبير المعنى
القول والبيان السحرى
من سعديه شلت انا سعدى
والوزن البيوزن شعرى
وشلت انا سجعى
شلت انا رجعى
فصاحة بيان من القبطان
وشلت طباقى شلت جناسى
من استاذى ابن البان
ومن يادابى قمت اشابى
وبس شان انى مريخابى
انا فرحان
وجواى الفرح فرحان
وحقيقة وثابتة فى التاريخ
وفى السودان
عز العز
حصريا على المريخ
والماشافو اما كفيف
او فاقد بصر وبصيره
يشفيه الله زول عميان
وزول عيان
__________________
المريخ تمامة الكيف
وامانى يكيف الزول كيف
المريخ محل تشريف
ومحل يلقى احترامو الضيف
وحاشا وكلا دون تزوير ودون تزييف
بطل افريقى ماهو وصيف
وفى التصنيف
عندو بطولة زى الاهلى زى مازيمبى
زيو وزى وفاق سطيف
امسح للحصول على الرابط
 0  0  13760

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019