• ×
الجمعة 29 مارس 2024 | 03-28-2024

مرثية الأستاذ أسحق الحلنقي في رفيق دربه الراحل محمد وردي

مرثية الأستاذ أسحق الحلنقي في رفيق دربه الراحل محمد وردي
كفر ووتر / الخرطوم 

ياأعز الناس حليلك وأنت حاضن العود تغني
وقلبي سارح في الغناوي الطالعة منك وشايلة مني
عندك إنت الفن رسالة تزرع الأيام تمني
ياحبيب كل الغلابة غبت وين الليلة عني
********
غبت ياالطير المهاجر وإنت لابس الشوق حراير
غبت ماشفناك بتشرب من عسل أحساسنا زاير
وأنت لو دارت عليكا ياوليف عمري الدواير
زهرة المقرن بتلبس من حروف أسمك ضفاير
********
ياسمح يازين حليلك في السمح بعد السماحه
العصافير ليك تهاجر وبيك تعود أبيض جناحه
الجراح الفي قلوبنا بالنغم داويت جراحه
ومنك أتعلمنا نغزل من دموعنا النازلة واحه
********
نحنا ما بنمسك دموعنا لما نسمع لو بهمسه
أما نور العين غرامنا مالو لو أهديتنا لمسه
وإنت ياوردي المشاعر يا البقيت للموجه مرسي
كيف يقولوا عليك مفارق وإنت عايش فينا لسه
********
قلت أرحل وجيت رحلت وما رحل أبداً مكانك
السحابة الفوق بتسقي وردة الأحزان عشانك
أوعي تمشي تقول مفارق إنت أسطورة زمانك
إنت ليك أنغام بتزرع في القلوب أزهار حنانك..
امسح للحصول على الرابط
 5  0  7374

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019