08-28-2018 10:33 PM









* مباراة للنسيان
* ما كان التعادل نتيجة خندقة هلال الابيض
* فكل الاندية سورية كانت او سودانية تخندق امام المريخ
* ولكن سبب التعادل الاساسي كان في كمية الاستهتار الذي ادي به المريخ ومدربه المباراة
* لعب المية بنعرفو ولعب الخمسمية بنعرفو ولعب المليون واضح
* امس بعض اولادنا لعبوا لعب اصبروا
* حقوقكم بتصلكم بتصلكم
* لعب المجاني كان واضح جدا
* لعب محمد عبدالرحمن بالذات
* كان لعب زول ماقابض
* قابض ريح الوعود
* كان سلبي لآخر درجة
* ليس لانه نفذ ضربة الجزاء المصيرية بتلك الرعونه وذلك العبط والاستهتار
* بل لانه اضاع فرص اضمن من ضربة الجزاء بنفس مستوي الاستهتار
* لعب المية وااااضح
* الامور المتعلقة بالفلس والعدم وتراكم المتأخرات لم تتغير بعد الوفاق
* ومع ذلك لم نسمع تلك الاصوات التي بحت طيلة عشرة اشهر تنهش في ذلك المجلس الذي كان يسيره رجل واحد فقط برغم رفض الجهات لتوليه امور القيادة
* صمتت تلك الاصوات
* وصمتها دليلا علي ان المريخ الهم ليس هو الاهم
* ولكن المريخ (المن ) هو المهم في المقام الاول
* ايها الناس
* لكم ان تتخيلوا قروش العضوية يرسلوا يشيلوها من النادي يوم الوقفه وصابح العيد كي لا يصرف منها علي مرتبات العمال والموظفين
* وتلك الاصوات تعلم وتسكت
* وكأن العمال والموظفين محرم عليهم العيد وعلي اسرهم
* حتي ابسط قواعد الانسانية في التعامل مع تلك الفئة لم تتوفر في ذلك التصرف وفي ذلك اليوم المبارك
* وكما تدين تدان
* واذا دعتك قدرتك الي ظلم الناس
* الباقي عارفو براك
* نعود للمباراة
* ملعبنا كان احد اهم اسباب التعادل
* ولو كان هذا السوء في عهد غير
* لاوسعتنا تلك الاصوات ضجيجا
* ايها الناس
* الحال المالي في المريخ الحالي لا يسر عدو ولا صديق
* واجتهادات الاستاذ محمد الشيخ وحدها لاتسيير الامور كما يجب
* وان كان حسب ما علمنا من الاخ اسد ان الوفاق كان مشروطا بتحمل جهات محدده لاعباء مالية معينة
* وفشلت تلك الجهات في التزامها الذي كان باعثا ودافعا للوفاق
* وفشل مجلس الوفاق في توفير كل ما التزم به
* يبقي الزحمه في المجلس لزومها شنو
* يبتعد اهل الوفاق فاسحين المجال لغيرهم
* فعدم وفاء الجهات التي التزمت بالتزاماتها هو في حقيقته فشل للاضافة الوفاقية الاخيرة
* فهل نري عجاج كرعينهم نتيجة الفشل القادنا لي لعب المية
* ام حايكنكشوا علي الكراسي ?
* أه يا مفلسين ومكنكشين كمان
* نعود للمباراة
* اكتر زول بضيع ضربات جزاء الغربال
* لزومو شنو يحتكر التنفيذ
* افضل اتنين بنفذو كرات ثابته من خارج الخط هما بيبو وسومانا
* فلماذا يقدنا الغربال ويصر علي تنفيذ كل الكرات الثابتة خارج الخط
* ايها الناس
* عندنا لاعبين
* مابقول اساميهما
* لكن مجموع ارقام فنايلهم الاتنين مع بعض يساوي عشرين
* ديل ما لعيبة مريخ
* مابشبهونا
* وبجيبو السكري والضغط
* وممكن يكتلو زول كمان
* ايها الناس
* محمد عبد الرحمن لما يجيب قون يبذل مجهود ويحتفل
* ولما يضيعنا زي يوم امس
* مابكلف نفسو يعتذر
* الجمهور اهم الجهات التي تمنح الرضا البوفق اللاعب يا كابتن
* وكان كجنوك الكدارة مابتتلبس ليك
* اعمل حسابك
* واذا محتج علي تأخير حقوقك لاسمح الله
* الزم بيتكم تعال لما تقبض
* عشان مانقبض الريح زي امس
* التش
* قلنا ليك وظف مهارتك للمجموعة تصبح نجم كل المباريات
* داير تلف وتدور وسط تلطاشر
* حاتسمع الكثير من صافرات الاستهجان
* وما اي وقعة فاول
* وليست اي كويمة ضربت جزاء
* انت موهوب وخيالك واسع
* افتح خيال ومرر الكرة فهي اسرع منك
* ايها الناس
* نعزي اخونا برجاس في والده ونسأل له الرحمة
* ونتقبل العزاء اليوم بدار النادي في فقيد امة المريخ عمنا احمد
* الرجل خدم المريخ ستين سنة باخلاص
* عليه الف رحمة وجعل الله مثواه الجنة
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* الشارع
* شارع شنو !
* اسي الجاب سيرة الشارع شنو !
* قصدي الشعب كلو
* شعب شنو ?
* الكي بورد ده الليلة مالو ???
* كلامو كلو شارع وشعب
* فايروس ياربي !!!!
* قصدي الناس كلها بتغني للوطن
* بواعيضك بواعيضك بواعيضك
* تقرص في ضبابينك
* ضبابينا مربية في خوارينك
* ضبابينك ضبابينك ضبابينك
* من يوم الهوي الاول
* قبل الجو يتحول
* مطارينك صبت في كواشينك
* حلاة طينك حلاة طينك وضبابينك
سلك كهربا
ننساك كيف والكلب قال لو كنتوا بتشتغلوا في اي زمان اي مكان اربعة وعشرين ساعة زي باعوضكم وضبانكم ده كان بقيتوا دولة عظمي
والي لقاء
سلك


تعليقات 0 | إهداء 0 | زيارات 2107






خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook

شروط التعليق

* يسمح بالتعليق لأي شخص كان شرط الجدية في الطرح

* عدم التطرق الى السب والشتائم في التعليقات لأنها ستحذف فورياً

* يجب أن لا تتعدى المشاركة حدود 500 حرف.

* يجب أن الإلتزام بالمادة المنشورة والمختار التعليق عليها تحديداً

* يهمل كل تعليق يتضمن شتائم أو تعابير خارجة عن اللياقة والأدب.

* يهمل كل تعليق يقدح بشخصيات بعينها أو هيئات.

* تهمل التعليقات المتسمة بروح الطائفية والعنصرية أو التي تمس بالذات الإلهية أو تمس المعتقدات الدينية.

* تهمل التعليقات التحريضية والتعليقات التي تتضمن تهديدات لشخص او لجهة معينة.

* تهمل التعليقات التي تتضمن ترويجا لجهات أو هيئات أو لأشخاص بعينهم.

* تهمل التعليقات التي تتعرض للكاتب وشخصه في مقالات الرأي أو التحليلات أو تقارير المراسلين.

* تهمل التعليق المتضمن ملاحظات حول إدارة التعليقات أو ملاحظات أخرى عن الموقع بعيدة عن الموضوع المختار للتعليق عليه، حيث أن مثل هذه الأمور لها بريدها الخاص

* •الموقع عربي فيرجى المشاركة فيه باللغة العربية



بابكر سلك

بابكر سلك

تابعنا على الفيس بوك


Powered by Dimofinf cms Version 3.0.0
Copyright© Dimensions Of Information Inc.

جميع الحقوق محفوظة لـ "كفر و وتر" 2010