11-14-2016 12:10 AM

(الحليم) هو الذي يضبط نفسه في لحظات الغضب ..
* والنكتة القديمة تقول .. ذهب الرجل للمحكمة يطلب فتوى يعيد بها زوجته بعد أن طلقاها ثلاث طلقات ..
* القاضي سأل الرجل : لماذا طلقتها ولماذا تود أن تعيدها ؟؟ فرد الرجل : طلقتها يامولانا لأنني كنت زهجاااااان وزعلان ، فرد عليه مولانا قائلا : وهل سمعت زوج طلق زوجته لانه كان مبسوطا ؟؟
* يعني كونك كنت (زعلان أو زهجان) هذا لا يبرر الطلاق ..
* وحقيقة أنا أعتقد أن الكابتن سيف مساوي قد قدم درسا لهيثم مصطفى يشبه الدرس الذي قدمه القاضي للزوج الباحث عن الفتوى ..
* مساوي قال : رفضت عرض المريخ إحتراما لجماهير الهلال (قال ذلك رغم أنه كان زعلان زي ما هيثم كان زعلان لحظة الشطب) ..
* قال ذلك رغم أنه تعرض لحرب في النصف الثاني من الموسم المنصرم ، قال ذلك رغم أنه لم يكمل العام الثالث كـ(قائد للهلال) ..
* قال ذلك وهو لم يكمل عامه الـ(17) في الهلال ..
* علما بأن مساوي مافي زول عمل ليهو إعتصام ، ولا في زول عشانو بات في النادي في عز البرد ، ولا في زول عشانو طلع برج الكشافات ..
* الكبير يكون كبيرا بمثل هذه المواقف وليس بالألقاب ..
* وقبل سيف مساوي قدم النجم المحبوب مهند الطاهر درسا بليغا لهيثم مصطفى وهو يركل (4) مليارات ويذهب ليوقع في الأبيض مقابل مليار ..
* انه الحب وإحترام مشاعر الجماهير التى صنعت نجوميتهما ..
* زي مهند الطاهر ده يفترض الهلال يعمل ليهو (تمثال) ..
* حب مقرون بالذكاء والبصيرة وتقدير عُشرة الملح والملاح والوفاء ورد الجميل ..
* يعني حكاية إنك مشيت لانك كنت في لحظة غضب وحاسي بالظلم هذا لا يبرر قبح الفعل ..
* عموما .. نرجو لسيف مساوي التوفيق في مشواره القادم ولو أننا كنا نود أن يذهب لهلال الأبيض ولكنه في النهاية (إختار وهو مخير في إختيارو) ..
* هذا ما يخص كابتن مساوى ..
* أما ما يخص كابتن (عزو) فهو .. تحصلت على معلومة من مصادر عالية الثقة أمس أكدت أن هنالك تفكير جاد داخل نادي المريخ بخصوص إنهاء عقد المدرب (هاي) والتعاقد مع الفرنسي غارزيتو ..
* (هاي) مدرب تعاقد معه المريخ قبل نحو شهرين وظل يتابع كل مباريات المريخ من على المقصورة بل (إتلتل) وسافر مع الفريق إلي الفاشر ومدني ونيالا وعطبرة ..
* المصدر أكد أن المريخ وفي سبيل (مكاواة) الهلال ربما بدأ فعلا في مفاوضة غارزيتو والإطاحة بـ(هاي) الذي لم يبدأ عمله بعد ..
* مدرب تلاتة شهور قاعد يأكل ويشرب ويقبض في الدولار ويأكل في التسالي وقاعد في المقصورة وفي النهاية ستتم إقالته قبل أن ينزل الملعب ..
* غايتو لو كلام (المصدر) ده طلع صاح تكون دي سابقة قبل كده ما حصلت في تاريخ كرة القدم ..
* (نكاية) في الهلال جايبين غارزيتو ، والفهم إنو يحرجوا رئيس الهلال ..
* مرات ناس المريخ ديل بضحكوني والله ..
* تفكير ناس المريخ بضحك من الأعماق ..
* من خلال تفكيرهم بتحس فيهم طيبة كده غريبة ..
* بتشوف فيهم (ناس زماااان) ..
* ما بنقدر نصدق إنو في عقول إدارية ممكن تفكر كده ..
* بنقعد نضحك بس ..
* المريخ يبحث عن بطولات يعيد بها توزانه بعد ضربة شيبوب وجابسون وأبراهومة ..
* فقدوا التوازن ..
* بقوا دايرين أي حاجة تُعيد لهم التوزان ..
* أنا شخصيا بعذر المريخاب لانو فعلا والله الحصل من الهلال السنة دي صعب جدا ..
* أربعة لاعبين في ظرف سنة .. حاجة صعبة والله ..
* شيبوب ، جابسون ، أبراهومة ، أوكرا … ديل الهلال شالهم من المريخ ..
* وأبوستة وسموأل والصادق شلش .. ديل أحرجوا المريخ وذهبوا للهلال ..
* يبقى يا مولانا (الجرح في المريخ لن يطيب إلا أن تقوم الساعة) ..
* ده جرح (ضلفتين) ..
* جرح خلى جمال الوالى يقعد يومين في جدة ويومين في الخرطوم ويومين بيكون في (الجو ما بين الخرطوم وجدة) ..
* وما شاف حاجة لسه دي المراحل الأولى ولسه ما مسخت ليهو الدنيا بطولا ..
* تاني كل تسجيلات بنعمل ليكم كده ..
* تشليع المريخ هو من الأهداف الإستراتجية التى يعمل من أجلها الهلال ..
* زي ما دخلناكم معانا الأبطال (صحبة راكب) بنشلعكم ونقدم هلال الأبيض ليكون هو وصيف الدوري السوداني باذن الله ..
* الهلال هو الذي يتحكم في خارطة الدوري والكرة السودانية بشكل عام ..
* مصيركم في يدنا ..
* خليكم إنتو مع (المصاب البقى ما مصاب) و(الما مصاب البقي مصاب) ..
* محترف جا من أهلو نصيح وأول ما خرج من (جلسة التفاوض) قالوا مصاب ..
* ومحترف آخر جا من أهلو مصاب و(عينو طالعة) وأول ما خرج من جلسة التفاوض قالوا نصيح وسجلوا ..
* البيقول داير قروش بيقول عليهو مصاب ، والمسكين السعرو عادي حتى لو مصاب بقول نصيح ..
* أسهل حاجة في المريخ يطلعوا ليك (تقرير طبي) ..
* والله صحي ..
* غايتو البيطلع التقارير الطبية في المريخ ده قطع شك زمان في المدرسة بيكون متخصص يشيل (أورنيك طبي وإجازة أسبوع دون وجه حق) ..
* مسكين النيجيري ما عندو حاجة وطلعهو عندو حاجات ..
* جا بيشكي من (نزلة برد) وطلب (500) ألف دولار طوالى قالوا عندو مشكلة في الدم ..
* المشكلة ما في الدم .. المشكلة في الدولار الحار ..
* وده كلو كوم وإقالة (هاي) الما بدأ كوم تاني ..
* أول مرة في حياتي أشوف لي مدرب بقيليهو قبل ما يلبس (بدلة التدريب) ..
* جا سياحة ورجع ..
* مشى مدني ونيالا وعطبرة ورجع بذكريات وإنطباعات كويسة ..
* غايتو غارزيتو لو شاف (شعر السماني ده بيقول ليكم لو ما حلق ما بلعب) ..
* مرحبا بالسمسارة في ديار المدفور ..
* وغايتو الله يكفينا شر (المُصدِي) اللمعتو الأيام ..
* ونركب صافنات ونجيبة ( بجاوية) وأصلو الزول بيموت والذكرى تفضل حية ..
* و..و..
* والقليب الراسمو حِنة يبدو من ….(قلب غارزيتو أحنه) ..


تعليقات 14 | إهداء 0 | زيارات 7664






خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook

شروط التعليق

* يسمح بالتعليق لأي شخص كان شرط الجدية في الطرح

* عدم التطرق الى السب والشتائم في التعليقات لأنها ستحذف فورياً

* يجب أن لا تتعدى المشاركة حدود 500 حرف.

* يجب أن الإلتزام بالمادة المنشورة والمختار التعليق عليها تحديداً

* يهمل كل تعليق يتضمن شتائم أو تعابير خارجة عن اللياقة والأدب.

* يهمل كل تعليق يقدح بشخصيات بعينها أو هيئات.

* تهمل التعليقات المتسمة بروح الطائفية والعنصرية أو التي تمس بالذات الإلهية أو تمس المعتقدات الدينية.

* تهمل التعليقات التحريضية والتعليقات التي تتضمن تهديدات لشخص او لجهة معينة.

* تهمل التعليقات التي تتضمن ترويجا لجهات أو هيئات أو لأشخاص بعينهم.

* تهمل التعليقات التي تتعرض للكاتب وشخصه في مقالات الرأي أو التحليلات أو تقارير المراسلين.

* تهمل التعليق المتضمن ملاحظات حول إدارة التعليقات أو ملاحظات أخرى عن الموقع بعيدة عن الموضوع المختار للتعليق عليه، حيث أن مثل هذه الأمور لها بريدها الخاص

* •الموقع عربي فيرجى المشاركة فيه باللغة العربية



محمد الطيب الأمين

محمد الطيب الأمين

تابعنا على الفيس بوك


Powered by Dimofinf cms Version 3.0.0
Copyright© Dimensions Of Information Inc.

جميع الحقوق محفوظة لـ "كفر و وتر" 2010