رحيق الختام ....... محمد عثمان الجعلى صقور الجديان تتعادل مع الغزلان من أهم ملامح صقور الجديان لهذا العام أنها كسرت قيود اليأس والإحباط التى كبل بها البعض نفسه وكما نلاحظ أنه قبل مباراة ساحل العاج كان البعض من قبيلة المتشائمين يتوقعون هزيمة المنتخب بنصف دستة وإنخفض معدل التشاؤم ليصل لتوقع الهزيمة بهدف أمام أنجولا ... ولكن خيب أبطالنا آمال أهل التشاؤم وتعادلوا بهدفين ... ورغم أن أنجولا كانت تتقدم بالهدف الأول إلا أن أبطال السودان لم يستسلموا وأحرز الدكتور بشة هدف السودان الأول فى المونديال بعدغيبة 37 سنة عن التهديف ، ولكن أبت نفس حكم موريتانيا على المغايرى المتحامل علينا إلا أن يحتسب ضربة جزاء لمنتخب أنجولا أحرز منها مانوتشو هدف الغزلان الثانى له ولمنتخبه ... ولقد إستغرب الأخ القطرى مقدم التحليل الرياضى فى قناة الجزيرة من فرح حكم موريتانيا بضربة جزاء أنجولا كأنه كان يتوقعها وجرى نحو منطقة جزاء السودان بفرح طفولى أفقده وقاره ( زى الشافع الجدعوا ليه حبة حلاوة فى منطقة 18 لحارسنا أكرم الهادى والشافع جرى يختفها ) ...ولقد قلت لبعض الإخوة من حولى مثل الهلالابى حسن أبوقرون والمريخاب كباشى نايل وبابكر حامد البطحانى ( شوفوا كيف الشاب نجم الدين يسعى لإحراز هدف للسودان ) لأنه يشعر بأنه تسبب فى الهدف الأول وقلت لهم إن شباباً بهذه الجسارة لن يرضوا بالخسارة ، وبالفعل جاء هدف السودان الثانى وكان حقنة من الدكتور بشة وكانت هذه المرة حقنة مهدئة لغرور أنجولا ولإنحياز الحكم ... ومباراتنا القادمة يوم الأثنين 30يناير أمام بوركينا فاسو ونسأل الله النصر لأبطال السودان ونتمنى ألا تلجأ ساحل العاج وأنجولا للخبث الرياضى وإخراج مباراتهم تعادلية للإطاحة بمنتخبنا !! وحتى لو حدث بيع لضمير فنكون عملنا العلينا ونسأل الله الإعانة والتوفيق . ***موقف نبيل من سودانى أصيل كنت أتناقش مع بعض الزملاء المصريين فى المكتب عن شيم وعادات أهل السودان وكان ردهم على طول أننى أقدم لهم الشعب السودانى فى صورة ملائكة .... وأنقذنى من هذا الإتهام ماورد فى الصفحة الثانية لصحيفة الخرطوم بتاريخ الأحد 22 يناير تحت عنوان ( ياسلام ياسودان هؤلاء هم أبناؤك ) بقلم الأستاذ النعيم الخير حسن عن قصة المواطن سامى عبدالقادر الذى إنتهى هو وزوجته من حج هذا العام وشعرت زوجته ببعض الآلام بسبب كسور سابقة ودخلت مستشفى المستقبل فى جدة من أجل الفحص ولكن الدكتور أوصى بعملية جراحية تكلف 30 ألف ريال وإعتذر الرجل وزوجته لعدم توفر المبلغ.... وتقدم منهما أحد أبناء السودان الميامين العاملين بالمستشفى بكل أدب وقال لهما أننى سوف أسدد مبلغ العلاج ومتى ما يتوفر لكم هذا المبلغ قوموا بتسديده لى ...تخيلوا موظف يستلم راتباً شهرياً يقوم بهذه المكرمة التى ظننا أنها إندثرت مع مقتنيات ذاك الزمن الجميل !! وأعطيت هذا المقال لبعض الزملاء السودانيين بالشركة وقرأه المهندس عوض الجيد بصوت مسموع فكان رد محمد سليمان بعد أن ازداد شموخاً ( حاجة عادية من سودانى ) ورد عدلى خميس ( ياهو ده السودان ) أما الإخوة المصريين فقال الأخ أسامة صالح ....معقول شخص مغترب وطالع ذمة أهله يقوم يتبرع بمبلغ 30ألف ريال لشخص ما يعرفوش .... وأما أيمن سعيد قال ضاحكاً بالله يا محمد قول للراجل الجدع ده أيمن عيد ميلاده يوم الجمعة 27 يناير وخد رقم جوالى عشان عايز هدية وتهنئة عيد الميلاد ... ولله در القائل ... من يفعل الخير لا يعدم جوازيه ....لا يضيع العرف بين الله والناس ... ونقول للأخ أسامة نعم هذا الأخ الكريم لايعرف سامى ولكن يعرف ربه وأراد أن ينافس فى إحدى عطاءات الآخرة فإذا كان عطاء الدنيا يقوم على المناقصة فإن عطاء الآخرة يقوم على المضاعفة .... ولو فتحنا إحدى مظاريف العطاء الإلهى فى الآية 245 من سورة البقرة نجد قوله تعالى ( من ذا الذى يقرض الله قرضاَ حسناً فيضاعفه له أضعافاً كثيرة والله يفبض ويبسط وإليه ترجعون ) ونسأل الله أن يبارك لهذا الأخ الكريم فى أهله وماله ويجزيه سعادة الدارين إنه غنى كريم . *** الهلال والزمالك ومباراة الثورة يوم السبت 11 فبراير يلتقى هلال العشق الجميع بأرض الكنانة مع فريق الزمالك المصرى فى مباراة ودية تخليداً لشهداء ثورة 25 يناير المصرية وسوف تقام مباراة أخرى بأم درمان مساء الجمعة 24 فبراير بين الفريقين إستعداداً لدورى أبطال أفريقيا ... طبعاً كل الهلالاب مشتاقين يشاهدوا هلال العام الجديد ... حاولت أن اعرف إنطباع بعض الجماهير الزرقاء عن هلال 2012 فإتصلت على الهلالابى الظريف إبراهيم بين وقلت له رأيك شنو فى هلال العام الجديد فأجابنى يازول أمبارح فى التمرين الفرنسى غارزيتو ( قرًب يقلب الشهادة ) شاف تمريرة توريه لفولنتاين التى مرت جوار القائم وأضاف تانى التفاهم بين أجنحة الهلال برطانة الهوسا يوسف محمد يقول لى فولنتاين ( كى ونًة ) يعنى الكورة ماشة وين ... ضربة معلم من إدارة الهلال التى حسمت أمر إعارة سادومبا لنادى عجمان الإماراتى لمدة 3 شهور بمبلغ 450 ألف دولار منها 150 ألف دولار لسادومبا والباقى للنادى ولقد جددت الإدارة عقد سادومبا مع الهلال لمدة سنة إضافية بمبلغ 250 ألف دولار تنتهى عام 2013 ...شايفين الهلال كيف مفرخة مواهب وشغل إدارى نضيف ....لذا لزم التنويه . *** همسة الوداع هلال العشق الجميل معسكره فى أرض الكنانة ومعسكر حبايبنا الحلوين فى أرض كينيا ... فرق كبيرطبعاً .... وبهذه المناسبة نهمس فى أذن صاحب القلم الأحمر إنتوا كينيا دى أرسلتوا ليها فرقة تتكون من إيدكو العاجى وواوا الزامبى ووارغو النيجيرى وموتيابا اليوغندى والزومة السودانى دى فرقة كورة ولا قوات اليوناميد ؟ مجرد سؤال .

• أدوات :
• [أضف تعليق]
• [إرسال لصديق]
• [طباعة]
• [حفظ بإسم]
• [حفظ PDF]

مبروك الاداء الطيب لفريقنا القومي ...و عقبال نشوف اول انتصار بعد غيبة طويلة من الانتصارات في هذه البطولة الافريقية ..بشه فتح الباب ...عقبال مانشوف اهداف اخري باقدام سودانية خالصه ..مبروك للسودان ...ضربة معلم اعارة سادومبا ..استطعنا تجديد العقد و سوف نستفيد من اللاعب في دوري الابطال ان شاءالله ..ممكن للهنود الحمر يتعاقد معه بعد 2013م (علي وزن طمبل تو).

ودخلت مستشفى المستقبل فى جدة من أجل الفحص ولكن الدكتور أوصى بعملية جراحية تكلف 30 ألف ريال وإعتذر الرجل وزوجته لعدم توفر المبلغ.... وتقدم منهما أحد أبناء السودان الميامين العاملين بالمستشفى بكل أدب وقال لهما أننى سوف أسدد مبلغ العلاج هكذا هم السودانيين ألفين تحيه .. لكن مجرد سعال وين سيد المستشفي مش سوداني؟ ولي آها هلالابي وأما أيمن سعيد قال ضاحكاً بالله يا محمد قول للراجل الجدع ده أيمن عيد ميلاده يوم الجمعة 27 يناير وخد رقم جوالى عشان عايز هدية وتهنئة عيد الميلاد ياأيمن سعيد نحنا ناسنا ديل في أعياد الميلاد دي مولد النبي بس غير كدي نهدي ليك أبيات من قصيدة بشري البطانه للحنكوشه العزمتو عيد ميلاده وقالت عيد ميلادى الشهر الجاى ولازم تحضروا قتلها خير قتلها خيييييييييييييييييييييييييييير ودخل فى اضافرى تقصدى ايه بى عيد ميلاده؟ ايا ربى اتولدت يا دابا؟ يبقى الاعياد سوها زيادة؟ امكن ولدت وانا ما عارف؟ يمكن ميلاد عيسى واجدادها يا ربى بدقوا الدلوكة؟؟؟؟؟؟؟؟؟ وبعزموا الحلال كالعاده بس قتلها خير وانا جاييكم وعديلة وزين والشهر الجاى مرق مركوبى من السحارة داقاهو المطرة قبل شهرين ونكت طاقيتى من العضاضة سليتلى ثماد رقعتها زين سديريتى ابوى مسويها لبد فرتقت اللبده مرقتها طين عراقى مغزوز فى الكوكار كان سوهو وقاية وكت فازعين سروال مدفون فى رهل العيش ملفوف محشور بين شوالين لميتن واديتن شطفة شريتن فووووق فى زريبت الزين والزين بقراتو مكوفرات تب مدغن طاقيتى هرنها زييييييييييييييييييييييييييييين شافتن السرة بت الهراف طردتن وجابتن لتاف وغضبت غضب وعزمت اقوم جفن ما جفن اقوم فى الحين مرقت ووشى مطوطو تب وصتنى الحلة رجال وعوين وصتنى ام نوفل لى كركار كان تلقى ودك جيب لى رطلين وقروشى حلف صرة وبى خيت وصتنى حليمة بت العجبين سروال لى محمد ورطلين بن بنبيعلنا شي ونديك بعدين وصانى الهابر لى مركوب مخلوفة وسرج وكرباجين عنقريب وموسر بى حبال قد تيبار ومسلة وابريق طين والناس بتوصى وغبيانة والناس غبيانة وبتوصى وانا ظرفى مكدر زى الطين وبتوصى وزى بايعلى بعير وانا بايع تيسى وعيش كيلتين والتيس اعور ما جابلو سعر والعيش بتاب ومسوس وشييييييييييييييييين تتسود ختوة هالسفرة انا ماشى لواجب اقوم بالدين؟؟؟؟ وركبت الباص مخلاتي دفس كدوسي وحقتي وعود سكين وانا راكب في الباص بتأمل ياربي بجيبو الحكامات بتسو دلوكة بيجوا الحلال ضابحين تيران ام خرفان صر مدققين كمين شوالات عيش وانا مالي ومال عيد ميلادن ان نقروا الدلوكة اولادن انا بنزل حربي ومتعكز وادارق اصقر في الدارات وانا معروووووووووف خراب حفلا ت وامسك صوتي المدهون قطران واركز واندق شان السمحات ما يقولن ضيفنا قريزن ساكت ووصل وسعل لامن جيتن وهداك البيت يرقش لوحات وصل ولقيت البيت مزرود لاحدو بنات سمحات شايلات هديات وحدات وردات وحدات زهرات شايلات رسمات في شكل ارنوب واسودونمور سبحان الله زي الميتات يضاحكو قر حايشين صينية تبق شمعات ماف زول قالي انت منو مابعرفو الضيف زي الخواجات لتيت عكازي وقفت طرف ملص نعلاتي اتفرجختا لي تفه خلالي مضنقلو تب سكيني ملسنه بالجمبات تبماكي وحُقتي مزرودا ولعتا كدوسي واخد جبدات وان بتأمل هذا العالم ياتو البنوت وياتو الجنيات وبحرت عيني لامن برقن كل البنوت زيها سمحات والبقر اشابه لي ضمة ما عرفت الراحن والفايتات لي حسن الحظ هي النقرتني ما شالت شك من شافتني ساقتني وقامت بالواجب هي اصيلة وراسية وست حوبات نادت صاحباتا بنتعارف نانسي وناندى وشيماء ولمياء ْ وحوراء وكفا من وين! من لندن جينا امس راجعين باكر زي ها الحظات من الطايف والمنشية ومدينة النيل وبنوت راقيات طيبات طيبة وكل كليمة معاها ضحيكة ونضااف ورهااف زي اللعبات واحدتاٌ فيهن سمحة سماح لكن مي طاعمة وانا زول مستغرب في حاجات ان زول اسراني سماحتاً كاسيا بنت البلد الهاديه وراسية وضميرا الحي التب مامات وقالت لي عرف نفسك بي عبارات عرف نفسك بي عبارات قتليها : انا الاسد الحرس غابتو الضريا وانا الساعة الكتال بختف حديا وانا الدايرني مابجيب لي هديا الهلالابى الظريف إبراهيم بين وقلت له رأيك شنو فى هلال العام الجديد فأجابنى يازول أمبارح فى التمرين الفرنسى غارزيتو ( قرًب يقلب الشهادة ) شاف تمريرة توريه لفولنتاين التى مرت جوار القائم وأضاف تانى التفاهم بين أجنحة الهلال برطانة الهوسا يوسف محمد يقول لى فولنتاين ( كى ونًة ) يعنى الكورة ماشة وين . هههه بالغ لكن أبراهيم بين بس قصة الهدندوي القال الفلاتة أدخلوا في السودان الكدنكة ورمضان . شايفين الهلال كيف مفرخة مواهب وشغل إدارى نضيف ....لذا لزم التنويه . والله محن قلت لي شغل أداري نضيف ؟؟؟ دي قبل البونيه وسب الدين قصدك يعني ولي متين عشان نكون عارفين يعني هلال العشق الجميل معسكره فى أرض الكنانة ناسكم ديل مايكونو معسكرين في ميدان التحرير ضربة معلم من إدارة الهلال التى حسمت أمر إعارة سادومبا لنادى عجمان الإماراتى لمدة 3 شهور بمبلغ 450 ألف دولار منها 150 ألف دولار لسادومبا والباقى للنادى ولقد جددت الإدارة عقد سادومبا مع الهلال لمدة سنة إضافية بمبلغ 250 ألف دولار تنتهى عام 2013 . العقد بينتهي في 2013 ده سادومبا ولي علبة ساردين .. غايتو العمانيين الله يكون في عونهم السلطان قابوس ياربي شاف سادومبا ده ولي حايتفاجأ .. لكن كويس عشان في شعوب متخيله نفسه أشنه بشر منها يعرفو أنو في كائنات أفظع

يا اخي انت لا تطور مقدراتك الصحفية ولا تستفيد من الكتاب الصحفيين بحق وحقيقة دع المهاترات والسخرية وحاول ان تكون كبيرا فان لم تستطع فكن مع الصغار فلا تستهر بفريق المريخ الذي هو سيد فرق السودان وحامل لواءه في الخارج ومحقق بطولات خارجية فمن غيره احرز بطولة خارجية ؟ مجرد سؤال

التحية مثني وثلاث ورباع الي جنود كلية المنتخب الوطني علي الادا الرايع والظهور المشرف في المباراتين السابقتين حقيقة المنتخب قدم دروس (ملح) الي كل من يعرف الئاس وكل حاقد ومحبط لا يريد التقدم لي السودان اداة رايع وحماس وعروض مزهلة ابهرت كل الافارقة مبروك للمنتخب التعادل وانشا اللة مزيد من التقدم والازدهار ياالجعلي دعواتك وسجدالتك

نسأل الله التوفيق لفريقنا القومى فى المبأرة القادمة مع التحوط لما ذكره أستاذنا الرائع ود الجعلى وهو خروج المبأراة الثانية بالتعادل و ضرورة التنبيه إعلاميا لهذا السيناريو المتوقع !! ونتمنى أن تتواصل حقن دكتور بشة والتى تكون دوما الكمده بالرمده !! وبغض النظر عن ما تؤول إليه نتائج المنتخب الأول إلا الأربع فرق السودانية المشاركة فى البطولات الأفريقية هذا العام سيكون لها شأن وستمضى بعيدا فى مشوارها وذلك بعد أن كسر أخوان هيثم و دكتور بشة حاجز الخوف !! كما لا يفوتنا فى الختام تهنئة الأخ أيمن يعيد ميلاده الميمون ونقول له عيد ميلاد سعيد و عمر إن شاء الله مديد ملئي بالأفراح والسعادة مع دوام الإنتصارات لهلالك هلال السعد الحاجب لضوء كل نجم!!

تمام يامكحل ياعسل جعلتنى أضحك من الأعماق خاصة قصيدة بشرى اختيارك موقف ياراقى اليوم السنجك وابوضراع ظهروا من بدرى ولك التحية يامانديلا ونشكرك على مشاعرك ياصفوة اين ابن الوهاج اين العريس بحر العلوم بلل يابلل ياعسل

أستاذنا الجعلى فتح الله عليك فتح العارفين قل آمين يارب مقالك مليان بروح الوطن وعجبتنى قصة السودانى الموظف بمستشفى المستقبل هذا الشاب الرائع اكثر الله من امثاله اين بريمة ومانديلا ودردقة وهذه الصفة الثلاثية لمسفى واحد ايه رايك يادكتور بالنسبة لبريمة يستخدم فقط عباراتين تيس وديك ياراجل اللغة العلابية مليانة ألقاب خد بعد من صفاتك واوصف بها استاذ الجعلى إذا عايز تشتم مثل أبله عبيط نحس اهبل بالله ارحمنا من عبارة تيس وديك يالطخ جدد شوية ياممل

	يا أيمن سعيد التورته جاياك مع اخونا سعد المليك من مصنع حلويات البرير لأكن عليها ثلاثه نجوم وهلال وعلى صفحتها صورة سادومبا ، قصرنا معاك

والله يا ( بلا مؤأخذة )المكتح بالشطة انت ما عندك اي موضوع وكلامك كلوا خارم بارم واسلوبك في الرد غير لايق ... مافي واحد منعك تناقد لكن ناقد في المفيد خليك من طول الكلام الزي لا ينفع ولا يجيب .. بعدين الشطة دي جاتك في عينك بس خلتك تنطط كدة؟؟؟ اشك في ذلك .

تم حذف التعليق لمخالفته لوائح النشر

جزاك الله خير يا الجعلي .. السوداني دائماً أصيل والسواد الأعظم من السودانيين أصحاب خُلق عظيم و أهل مروة ... من هنا نبدأ ونقول لأي سوداني في بلاد الغربة تذكَّر أنك دبلوماسي شعبي لا يصدر منك إلا الجميل و شكراً لك مرة أخري أستاذنا الجعلي .