العين بصيرة واليد قصيرة * بدون خوض في تفاصيل صحة توقيع النيجيري يوسف هوت أمام سكرتير الاتحاد العام مجدي شمس الدين أو عدم صحة الإجراء يظل مبلغ السبعمائة ألف دولار التي وعد بها أبو الهل لتسديدها لنادي سيون السويسري هي العقبة التي تواجه الأهلة في إكمال الصفقة.. * سبعمائة ألف دولار قد تطيح بآمال الكثيرين ممن يحلمون بعودة النسر النيجيري لصفوف الجماعة. * قالوا عديل كده (أمهلونا أسبوع) والأنباء الواردة من أنغولا أفادت أن هوت بصم، ولكنه أيضاً لم يوقع الا بعد استلام ثلاثمائة وخمسين ألف دولار. * ولكن يا كبدة عيني (الهالة سأبة). * كدي شوفوا مطمورة العيش عسى ولعل.. * ولا أقول ليكم اعملوا (ختة) يا عمدة. * وأدوا الصرفة الأولى لبرجاس.. * منى عيني أرى الهلال مكتملاً وصار بدراً. * المريخ كبير يعشق ملاقاة الهلال مكتمل العدة والعتاد. * مسعولين من الخير.. وين المحترف البرازيلي.. * ما عايزين نقول أبو مليون دولار يا إيفوسا الأجلح. * ناس تعشق الفشخرة.. لكن يا حسرة من فين العين بصيرة واليد قصيرة. * رمضان في البركان.. وكمان بردان.. البشوف رمضان متفسح في لندن يقول جايب ليهو كأس جوي. * متين نشوفك متصور مع كأس أفريقيا يا رمضان. * نحمد الله معسكرنا اكتمل. * كانت حاجة مريم عاملة لينا شوية ملاوزة وكده، ولكن الضباح وصل المعسكر وكمان البطاح والنطاح. * كل الهجاج شكلوا حضوراً وبانت نواجذ كاربوني ومعاونيه. * سمعنا تحت تحت أن إيداهور اتمرن أربع ساعات لوحده. عافي منك يا اب زرد. * قلق.. وارغو.. العجب.. والنفطي.. والعين أصابت النفطي. لكن جات خفيفة. * الأجواء في نيروبي أجواء فول وبس.. * يا مولانا حسن يوسف احرس المعسكر كويس.. وخلي اللاعبين ديل يساعدونا بالسكات والتمارين الحارة والموية الباردة. * معسكر خلوي بعيد عن أعين الفضوليين والطفيليين. * إن شاء الله منصورين. * جسر جوي لنقل الجزائريين لأنغولا لمتابعة لقاء الجزائر وساحل العاج في ربع النهائي. * إذا ما قدر للجزائريين تخطي الآيفواريين فإنهم سيلاقون الفراعنة. * والقيامة حا تقوم في أنغولا. * كنت أتوقع ألا يجد المنتخب المصري أي صعوبة في تخطي المنتخب البنيني. * وقد صدق حدثي وها هو أحمد المحمدي ومع بداية المباراة يكرر شريط (دحدوح) في مرمى الهلال عندما عكس الكرة من منتصف السنتر في المقص البعيد لشباك البنينيين. * في مباراة نيجيريا وموزمبيق أمس استمتعت بأداء الحكم كوليبالي.. وللعلم كوليبالي هو حكم مباراة الخمسة في المقبرة. * خمسة وخميسة.. * ألف حمد الله على سلامة الأخ الحبيب جمال أحمد عمر الكيماوي بسلامة الوصول معافى من أرض الكنانة. * حمد والديبة حاجة عجيبة.. الديبة بالأمس منع من دخول النادي الأهلي على خلفية الشكوى التي تقدم بها مطالباً بمستحقاته المالية...... روووووووووووق يا ديبة. * ما شفت مازدا صابر كيف.. ومجلس المريخ عامل أضان جلد. * النصيحة ليك يا الله.. الأمل دا كان عاوز يجيب ليهو نتيجة إيجابية في الكونفدرالية.. اشتروا ترين سوت للمدرب محمد الطيب.. البدلة أم كرافتة بتلحق الأمل أمات طه. * قلبي يحدثني أن فاروق جبرة سيحقق هذا الموسم نتائج إيجابية مع الأفيال. * بس اخلص شوية.. يا مخلص. * هل يفعلها مجلس إدارة الاتحاد العام ويحرم الهلال من عقودات الثنائي التاج ويوسف محمد.... أنا رأيي خلو.. انتو رايكم شنو؟ * بدأ كورال الجماعة في إنشاد المرثيات.. وها هو إبراهيم عوض يستنجد.. وهمشري يطالب الكيانات الزرقاء بالمشاركة والمساهمة.. * ما قلتوا؟؟؟؟؟ * أدفع نصف عمري وأعرف لماذا يتدرب المعز في الدوحة... يا ربي بتدرب في شاطئ الأحلام. * لاسانا جاهز موية ونور.. ويمكن إعفاؤه من الإعداد الأولي بمنحه أسبوع راحة ولكن بشرط أن يكون في نيروبي قريب من المدرب. * وأتوقع أن يكون معسكر نيروبي من أنجح المعسكرات. * كسراني يا مكسراني. * وكسرني يا جدع. * جاهزون لمؤارزة المريخ في مباراته الأولى.

• أدوات :
• [أضف تعليق]
• [إرسال لصديق]
• [طباعة]
• [حفظ بإسم]
• [حفظ PDF]

المرة الفاتت طيش المجموعات خوفي المرة دي مع العتاولة ديل المجموعات ماتحصلوها
احسن ليكم تشوف كنفدراليتكم من بدري العرجي لمراحها الابطال انت ما ناسا مدوا ارجلكم قدر ليحافكم
حلم الغلابة عيش

ولا أقول ليكم اعملوا (ختة) يا عمدة.
اللخو حسن :
مالك كاشف حال الجماعة: الختة دي إلا يطبقو ليها الحنة ( حنة الخمسة).
و من ما قمنا عرفنا أنو الختة بتكون في يوم الحنة الأول.
أحسن يرجو الكشف.

انت بتقول فى شنو
يطرشنى اكان فاهم حاجه

ها هاها ها هي هي هي ............. اللخو مريخابي ؟
تدفع نصف عمرك عشان تعرف المعز بتدرب ليه في الدوحة .. ولو المعز وافق يسجل في المريخ تعملوا ( زايغيين ) عشان هو يدفع كل المبلغ .. عالم جبانات
ماعندكم موضوع بقيتوا تتكلموا في بدلة وكرفتة مدرب الامل .. صحيح المثل البقول ( الما يتشوفو في بيت ابوك بخلعك ) والله انتو الترنج يخلعكم خليها البدلة والكرفته

واللْه ياللخو انا ماعارف لما اقرا عمود هلالابى اتذكر الاعلان التلفذيونى ....خديجة وقعت من البلكونة ليه

يا صاحب المقال يا مناوي القائل (انت بقول في شنو ؟ يطرشني لو فاهم حاجة ...) اقول ليك يا رشاشة انت مالك ومال مقالات الصفوة ... المقال مقالنا ... والكلام كلامنا ... وانحنا فاهميو كويس ... انت الوداك شنو وشوبرك في القراية .... غايتو عالم حشرنجية بشكل ... يا رشاشات الحقو مجلس ادراتكم اللحق امات طه ...