البدري قال عايز دوري الابطال قام طار ..! اي واحد في امة الهلال كان مقتنع انو الهلال متأهل لمرحلة دور ال16 الافريقي والقناعة دي ما جات من فراغ جات لانو اهل الهلال كانوا عارفين انو نجوم الهلال كبار وعارفين دايرين شنو وبعملو في شنو يعني موضوع انو الهلال في دور ال16 بالنسبة لي لامة الهلال موضوع وقت ليس الا عشان كده ما كانوا شغالين بمباراة الهلال خالص خالص لانو الهلال حسم الموضوع من مقبرته بي تلاتة اقوان ..كل قون يحكي عن روعته ..! اها الهلال مشاء الله والحمد لله والشكر له تأهل عن جدارة واستحقاق وبالنقاط كمان مش بفارق الاهداف يعني من مجموع ست نقاط حصل علي اربع منها بينما ذهبت نقطة وحيدة لمنافسه .. نخلي الهلال فوق عديلو شوية كده ونمشي للجماعه الطارو من دور ال 32 .. اذكر قبل فترة وعقب فوز المريخ علي انتركلوب الانغولي ذهابا في الخرطوم بهدفين دون رد اجري موقع الاتحاد الكاف حوارا مع المدير الفني للمريخ حسام البدري .. تحدث البدري عن دوري رابطة الاندية الافريقية وقال انو اعد فريقه جيدا للفوز بدوري رابطة الاندية الافريقية .. وقامت الصحف الحمراء بنقل الحوار والطبيعي ان تصدق جماهير المريخ ما صرح به البدري لانها في شوق لاحارز اي بطولة بدليل انها اقامت الدنيا لمجرد ان فريقها كسب الهلال في ثاني مباراة للممتاز وبدأت الجماهير تتحدث صراحة عن فوز المريخ بالدوري الممتاز منذ الاسبوع التاني وزادت الاحلام ودعهما الاعلام الاحمر بكتابات عن سكوهة الهلال وعن المريخ نار المنقد والمريخ المابنقدر وعن فريق الاحلام وعن امكانية الفوز ببطولة رابطة الاندية الافريقية .. حتي وقعت (الطوبة في المعطوبة ) وخرج المريخ منكسرا من دور ال32 امام فريق لا تاريخ له في دوري الابطال ولم يصل يوما الي ثمن النهائي في هذه المنافسة الكبيرة ..! انتو طبعا عارفين ناس الاتحاد الافريقي عملوا نظام الذهاب والاياب كما يحدث في كل العامل عشان شنو .. دور ال64 عملهو عشان يصفو 32 فريق ودور ال32 عملهو عشان يصفو الاندية ل 16 فريق يعني الاندية الضعيفة والتي لا تستطيع المنافسة مع الكبار احسن ليها توفر قروشها ساكت اخير ليها من التلتة والسفر وووفود المقدمة والحوافز والاقامة وهلمجرا ..! ده الحصل لناس المريخ بالضبط يعني خروجهم من دور ال32 مع الاندية الضعيفة وفر ليهم كتير يعني تاني سفر مافي .. خوف مافي .. وفود مقدمه مافي والله وفود المقدمة تاني الا لي كادوقلي و شندي او الحصحيصا ومدني وعطبره عن الطياره تاني الا بورتسودان بس ..! واحد هلالابي ثقيل رسل لي رسالة جاء فيها : اقترح ان تقوم جماهير المريخ الجمعة المقبلة بتنظيم اعتصام باستاد المريخ ويرفعوا لافتات مكتوب عليها ارحلو خلاص تعبنا واذا لم يستجب المجلس لتلك النداءات عليهم الاستعانة بحلف الناتو ..! واحد اثقل منو جاءت في رسالته ابيات شعرية قال فيها : ودع المريخ ان (البدري ) مرتحل .. هل تطيق وداعا ايها (الحضري ) ..! كل الاعلام الاحمر يتحدث عن صدمة عنيفة المت بالمريخ لهذا الوداع الحزين والخروج المذل لفريق كانت احلام جماهير الوصول الي النهائي والتوشح باللقب الافريقي او هكذا اوحت الاقلام الحمراء لتلك الجماهير المسكينة التي شبعت وعودا لم يتحقق منها شئ منذ العام 2003 وبحسابات بسيطة طبعا ما زي حساب الحكم الذي ادار مباراة المريخ وانتر كلوب المريخ شال الدوري الممتاز مرة واحدة ووصل نهائي الكونفدرالية مرة واحدة يعني رسوب عديل بدون بديل..! اها نجي راجعين لموضوع الحساب بتاع الحضري الداير يغالط فيهو الحكم يعني الواحد ممكن يمشي السوق ويغالط بتاع الطماطم وممكن يمشي البقالة يغاط بتاع البقالة انو الطحنية دي شوية زيدها او الزيت ده حبه لكن من الله خلقنا ما شفنا لينا حارس مرمي بيغالط في حكم انو فريقو عندو ضربة جزاء ما لعبها الا السيد الحضري عليكم الله شفتو جنس ده ..! واحدة من صحف المريخ نشرت بالامس انو نجوم المريخ وعقب الخروج امام الانتر دخلو في نوبة من البكاء والنحيب انتو عارفين ديل كانوا ببكوا علي شنو ما علي خروج المريخ من دور ال32 ديل كانو ببكوا علي ال5 الالف دولار الوعدهم بيها الوالي وطبعا الدولار الايام دي سوقو حار نار يعني ال5 الف دي كانت بتعمل للواحد قريب ال20 مليون راحت شمار في (انتر) يعني الزعل ما موضوع انو المريخ طااااااااار الزعل عشان الدولار الحار ..! اخيرا اخيرا ..! في اول رد فعل للخروج من دوري الكبار قال الاخ جمال الوالي رئيس نادي المريخ ان وداع بطولة الكبار محزن .. والاطار الفني المصري قااااعد وزاد علي ذلك بقوله : تقدمنا بطلب لتنظيم بطولة سيكافا ودافعنا لذلك النجاح الكبير للمريخ في تنظيم بطولة 2009 .. طيب عرفنا انو البطولة التي نظمها المريخ في العام 2009 كانت اعداد للفريق لدوري ابطال افريقيا .. طيب البطولة دي عاملينها اعداد للدوري الممتاز يعني ؟ اقول ليكم حاجة انتاو اتسلو بسيكافا دي وشيلو بطولتها لانو الهلال ما بشارك ما عكم عارفين ليه لانو الهلال بكون مافاضي للبطولات الهامشية دي .. الهلال وقتها بكون مهموم ببطولة دوري رابطة الاندية الافريقية وخليكم انتو في سيكافا بس انشاء الله تشيلو البطولة ما يحصل عليكم زي الحصل السنة الفاتت ..! اها بكرة الاسياد جايين من انغولاء مع اولادكم اقترح عليكم انكم تعدوا ليهم استقبال كبير لانو دي السفرية الاخيرة او الاستقبال الاخير هذا العام يعني لو دايرن تستقبلوهم الا تنتظرو العام 2012 وتحديدا في شهر مارس بداية بطولات الاتحاد الافريقي ..! طيب تعالوا نشوف الفريق عبدالله مساعد رئيس المريخ رئيس القطاع الرياضي قال شنو قال انهم اغلقوا ملف البطولة الافريقية .. لا ياخي احسن تخلوهو مفتوح قافلينو مالو . .. لكن الغريبة ما قال فتحتنا اي ملف تاني يكون خجلان يقول فتحنا ملف الدوري الممتاز ولا شنو يا جماعه ..! لكنه سرعان ما استدرك قائلا : ان التفكير الجاد في بطولة الدوري الممتاز خاصة المباراة التي تعقب مباراة البطولة الافريقية قد يعود لمتاعب في البطولة المحلية وهنا الرجل بقول كلام زي الفل كلن برضو ماعندو مشكلة لانو الهلال لو فاز ببطولة الممتاز (كالعادة ) بخليكم تمثلو معاهو مش عملناها قبل كده اكثر من مرة ..! اخيرا جدا ..! ملاحظة غريبة كل الاندية التي شاركت في دوري ابطال افريقيا احرزت اهدافا في جولات الاياب الا المريخ ..! كل الاقلام الحمراء شنت هجوما علي نجوم المريخ ووصفتهم بالاستهتار بل طالب احدهم الحضري ان يدفع غرامته بنفسه والا لا حوجة للمريخ به ..! استمتعت بالامس علي غير العادة بقراءة اعمدة كل الزملاء الذين ينتمون للمريخ والله جرستهم عجبتني شديييييد مرة يقول ليك البدري .. ومرة موسي الزومة .. ومره العجب .. ومرة قريش ما محظوظ .. الغريبة المرة دي اصلو ما جابو سيرة التحكيم لعل المانع خير ..! اذهبوا فانتم الطلقاء ..!

• أدوات :
• [أضف تعليق]
• [إرسال لصديق]
• [طباعة]
• [حفظ بإسم]
• [حفظ PDF]

اولا اهني فريق الهلال على صبره الذي دام الى أكثر من ثلاثة وثمانون سنة ولم يحصد غير السراب. سيكافا التي تستهجنها شاركت فيهاانت خمس مرات وأحسن نتيجة تحصلت عليها أن بلغت نصف النهائي وخرجت على يدابزرد الذي فاز بها أكثر من مرة في محاضرة كروية بقيادة الدكتور سكسك.أما المريخ فمهما أخفق فانه أتى بما لم يأتي به غيره من الاندية السودانية(كأس مانديلا ومعاه حبة كؤوس اقليمية ودولية تشريفيه) فأين انتم من هذا الشرف.أما عن الحكم فقد ادار المباراة بدرجة امتياز فلماذا تقدح فيه الاقلام (الحمراء) الحرة التي اعتادت أن تقول الحقيقة لا أن ترشي الحكام حتى تأتينا بسنة الهجين. وبرضو الصفر الدولي الكبير لن يغادر داره وسوف يزداد كبرا ككرة الثلج كلما تقدم الهلال في البطولة لأن المحصلة النهائية معروفة خمسة أهداف من عينة رش المقبرة وعصير فييرا أو موية ترباس. ازيدك ولا كفاك؟ أحسن اخليك عشان تكتب بكرة.

تم حذف التعليق لمخالفته لوائح النشر

آآآآآآآآآآآآىىي ياقسم آآآآآآآآآي آآآآآآآآآآآآآآي آآآآآآآآآآىي !! بالتقيل ياميكائيل .. وريهم عشان يبطلوا فصاحة ولداحة ... ناس ياكافي البلا من قولة تيت صيفو !! والله لكن كف وشلوووووووووووووت

] اليومين ديل عمودك بنزل بدري فرحان لخروج المريخ اكتر من صعود الهلال انه المريخ في الحالتين يفرح رغم الألم ورغم الدموع سنظل نعشقك يا مريخنا العظيم ولن نتركك تسيييييييييييييييير وحدك يا مريخ رغم كيد الحاقد[/font]ين

اصدقك القول يا هذاالقسم عمودك هذا ينفع ونسة على بمبر ست شاي تحت ضل شجرة او مشاكسة صبية على قارعة الطريق ومثله الكثير الكثير من ما يسمى اعتباطا اعمدة صحفية ، أرحمونا يرحمكم الله وامسكوا علىكم هذه الونسات التي لا تقدم ولا تؤخر وكونوا أكثر موضوعية وأكثر التزاما الى جانب الكلمة الرصينة التي تبني ولا تهدم !!!! هل كرة القدم هذه تلعب في السودان فقط ام هي اللعبة التي تجتاح كل العالم من صياصيه الى صياصيه ما سمعنا بأعمدة هراء مثل هذه الأعمدة انظروا حولكم من الدول مصر السعودية وغيرها وغيرها هل ترون صحفيين يرتزقون بمجرج التمسح بالانتماء الى نادي ؟؟؟؟؟؟؟ بالأمس كان دور الهلال وودع الكونفدرالية بضربات الترجيح واليوم الدور على المريخ وغدا غدا غدا القريب جدا سيأتي الدور على الهلال والله لا اقول ذلك تهكما او تمنيا للهلال بمغادرة بطولات الكاف لكنها عين الحقيقة التي فقط تحتاج الى الوقت المتمثل في ملاقاة الافريقي ثم التدحرج الى الدور 16 مكرر ثم المغادرة فاذا كنت انت ومن معك صحفيين بحق عليكم سلك الطريق الذي يجنب الهلال هذا المنحدر فوقتها والله نرفع لكم العمم والقيعات والتيشرتات وغيرها تحية واجلالا ولكن ان تسوقنا وراءكم في مثل هذه الهرطقات انت من جهة ومزمل من جهة والمدعو ابراهيم عوض من جهة فاقترح عليكم ان تجتمعوا في ونسة " جبنة كاربة" او طربيزة كوتشينة وتتداولوا مزحاتكم البايخة هذه بعيدا عن الصحافة وأعمتدها.

تعرفو يا جماعة ان حكاية تاهل الهلال لدور ال 16 عاديه شديد يعني زي ترسل ليك شافع وتقوليهو جيب لينا طماطم ويجيب طماطم يعني عاااادي .. لكن طبعا في شفع بترسلهم لي طماطم يجيبو ليك قرع

الاستاذ/ قسم خالد تحية يسبقها احترام، لا أملك إلا أن أشكرك على هذه الحقائق التي قد وضعتها في قالب السخرية فكانت فكاهة تجلب الضحك والسرور وفي نفس الوقت حقيقة مرة كطعم العلقم على إخوان لنا. جزاك الله عنا خيراَ لقد جعلنا نضحك من أعماقنا على هذه المهازل التي تحدث في المعسكر الأحمر. لكن بيني وبينك دا كلوا عشان المال ما نظيف.

والله تغيرت نظرتى فيك 180 درجة وكنت وضعتك بأنك مرات من احسن الصحفيين لكن حكاية بكاء لاعبى المريخ على الخمسة الاف دولار افهمتنى انك كاتب صغير ارعن متخلف؟؟ الكبير كبير فعلا والصغير صغير وفاقد الشئ لايعطيه؟؟والله العظيم متخلف ماطبيعى؟؟ لم اشاهد مشجع هلالى صغير تكلم عن الخمسة الاف دولار لانه تأكد وعرف انه موضوع تافه!!!

قمه الكذب و الدجل ارجع و طالع عودك بعد المباراة الاولى و عمودك اليوم و سوف تعرف انك كذاب من الدرجة الاولى و هى العيشة التى تجبر امثالك على التكسب من الكذب و الضلال و بيع الوهم لجماهير الهلال التى سنويا تعيش و كلها امل بان الفريق سوف يحرز بطولة خارجية يطوى بيها صفحة عمرها اكثر من 83 سنة و فى كل عام على اعمدة الوهم الهلال يتوج بطلا لعموم اندية افريقيا حتى تظهر الحقيقة عندما يلتقى الهلال مع اى من ابطال افريقيا المعروفين عملا لا قولا و يعود لموقعة الطبيعى و تبداء حملة التبريرات المعروفة مع ان الكل يعرف ما ستنتهى علية هذا الفرحة الموسمية منذ سنين وهى معلومه حتى لادارة الهلال و لاعبية و جماهيره و لكم انتم معشر الكذابيين الا ان استمرارها من مصلحتكم انتم فقط و انتم سوف تجنون منها الملايين حتى ان يخرج الهلال سوف تجمعون مبالغ طائله و مشاركة الهلال عندكم موسم تبنى علية الامال و المشروعات الاسرية و لعن الله الكذب و الكذابون من امثالك