| جديد المقالات |
|
| جديد مكتبة الاخبار |
|
جديد مكتبة الاخبار
جديد الفيديو
المتواجدون الآن
تغذيات RSS
|
|
أوف سايد
12-04-2009 02:33 PM
الليله يوم الخبت
* قمت من النوم مذعورا وتخيلت أنني هلالابي وتملكني شعور عجيب وغريب وخوف لدرجة الهلوسة والتوجس.. بنت اختي الصغيرة فرقعت بلونة فقفزت فزعا صائحا: لا يا كلتشي.. ما من أول دقيقة خليك حلو.
* يا ربي القميص الأزرق اللبستو دا اثر فيني لدرجة اني بقيت اشوف اي حاجة حمراء تمسكني ام هلا هلا.. يا وليه شيلي البطيخة دي من قدامي وكمان مقطعاها في شكل نجمة.. نحن الليله ربنا يمرقنا من ناس قلق ديل.. ولا الود بلة الجابر الحالف يخت الكاف في حته والبوندي في حته تانيه.. ديل جايين مولعين.
* يا ربي بي مشاكلنا دى بنقدر نصمد امام هجمات الحمر ديل؟.. أولادنا لم يستلموا حوافزهم ليهم شهرين.. والود فييرا لاعب بالتحنيس يعني حيلعب بطرف الكدارة.. حتى سيدا زعلان وحردان من حديث القطب الرياضى في إذاعة السماني.. السماني العايز يتصالح مع إبراهيم حجازي الذي أساء لنا من طرف..
* حتى مدربنا كامبوس قالوا شحن عفشو.. وواقف تود ومنتظر بس صافرة الحكم.. لا لا الحالة دى غير مطمئنة.. الهالة سأبة بعدين الود خميس عبد الوهاب دا مضيقها ضيق شديد وحيجيبها لينا ضقلها يكركب..
* لاعبينا ديل اكيد متأثرين بالخلافات بين برجاس والعمدة.. برجاس اليومين ديل مركب ماكينة رئيس وسكرتير وامين خزينة والناطق الرسمي كمان.. والعمدة زعلان وحردان في المدينة.. اقول ليك مدينة الرسول تقول لي ديم مدينة.
* بعدين نحن لحدي دلوقت ما لقينا لينا حكم عشان ما يدينا ضربة جزاء المقررة.. كل الحكام عملوا لينا أضان جلد حتى حكمنا المرشحنو عمل زغبير..
* الهالة سأبة والخلافات ضاربة بأطنابها في زريبة العيش.. يا ربي انا بقيت هلالابي؟.. بقيت استمتع جدا بروائح الكسبرة والتوم من زريبة العيش واستمتع بأصوات الزيطة والزمبريطة وفي موقف ام بدة دي هالة سأبة شديد.
* ما دام نحن شلنا كأس الممتاز يعني شنو لو غلبونا؟.. لكن بيني وبينكم حارة مسالة تفطيس الكأس دى.. نمرق بي وين مع مظاهرات الفرح الحمراء في شوارع الاربعين والعرضة.
* والنصيحة ليك يا الله التلاتة محمدانا كان زغنا من ايداهور القالو كاربوني خاتيه للحظات السوداء.. حيبدأ لينا بالسعودي.. بتاع الاهداف الطائرة.. الود دا قبل كدا من نص الميدان عملها أرسلها باكوورد في سقف المرمى خلا خشومنا ملح ملح.. أمشي خليهو تاني يكررها يا معز.. المرة دي ما شربكة في الشباك.. الشربكة في باب الخروج.
* وبس خلاص زي ما بقول شعبان عبد الرحيم..
إن سايد
* الذهاب لمصر يعني الحقارة يا يوسف السماني.
* خليك عاقل وانسى الموضوع دا.
* خليك مع كورة الليلة.. الليلة يوم الخبت.
* من ربع الساعة الاولى كل زول يشوف فردة حذائه وين وعلى موقف جاكسون عدل..
* ساعدونا بالسكات والمويه الدافئة.. الدنيا برد..
* حنهريكم..
* هل يستطيع هلال زرقان الصمود 90 دقيقة؟.
* انا خايف من قولة تيت ينكشف المستور..
* كلمة السر عند جماهير المريخ هي خمسة مازيمبي.
* ذكروهم بالذي مضى..
* مع كلمة مازيمبي الرجفة بتحصل والتركيز بطش.
* لا يا كلتشى بشويش.
* ناس السكري والضغط والذي كان.
* عارفين وفايت أضانكم في وجود اكرم لم يخسر المريخ إطلاقا أمام زرقان.
* مغلوبين مغلوبين لو زرقان حارسو كاسياس.
* معايدة فنانة وصلتني من وزير فنان.. كل سنة وانت طيب يا سعادة الدكتور سامي عبد الدائم وزير الدولة بالرعاية الإجتماعية.. مع الأمنيات بالانتصار في مباراة اليوم.
* وفنان آخر ومبدع في صحيفة الصدى اسمه مصطفى ابو نورة يستحق منا التحية للمجهود الكبير الذي بذله في التصميم الجديد للصحيفة.
* اليوم الرابع من ديسمبر عيد ميلاد الابن محمد كمال الدين أبو صباح والذي قمنا بتهنئته في هذه الصحيفة في عيد ميلاده الأول العام الماضى.. ففاز المريخ على الهلال بضربات الترجيح .. نهنئه اليوم ونتمنى أن يفوز المريخ عديل كده.
* إننا لا نخاف الهلال ولكن نخشى انحياز الحكام.
* اللهم يا رب ببركة الجمعة الجامعة والكلمة السامعة تدينا الفي مرادنا.
* والليييييييييييلا... الليله يوم الخبت!!
الصدى
|
خدمات المحتوى
|
حسن محجوب
تقييم
|
|
|
Powered by Dimofinf cms Version 3.0.0
Copyright© Dimensions Of Information Inc.
جميع الحقوق محفوظة لـ "كفر و وتر" 2010
المقالات
مكتبة الاخبار
الفيديو
0 | 
0 | 
483
