11-11-2009 10:45 AM
وان طال السفر

ركز في ورقك ؟

اصبح المريخاب يحملون (هماً)من كل برنامج تلفزيوني او صحفي او اذاعي يتم فيه استضافة رئيس نادي الهلال صلاح ادريس، لأن صلاح ادريس اي (منبر) يطلع فيه يقول : (حسمنا لينا امر لاعب كبير)

* وبقول كمان : (خلاص موضوع اللاعب دا اتحسم بشكل نهائي ...وما في زول عارف الموضوع دا غير الطاش)

* الطاش ذنبو شنو؟.

* انا خايف اللاعب البكون مقصود هو ذاتو ما يكون عارف.

* احتمال يقرأ خبر حسم صفقة تسجيله في الجرايد.

* ناس صلاح ادريس ديل ممكن يسجلوا اللاعب من غير ما يعرف.

* قلت ليكم الهلالاب ديل شفوت .. قعدتوا تغالطوا.

* غايتو صلاح ادريس دا لو عمل ليه اربعة حوارات اعلامية جديدة...بكمل ليكم لاعبي المريخ الفي الكشف.

* واحتمال بعد لاعبي المريخ ما يكملو...صلاح ادريس يقبل علي لاعبي النيل.

* الايامات دي اي لاعب في المريخ قالوا ليك حارسنو تسعة.

* اي لاعب مفكوك يبل رأسو.

* المفكوك والما مفكوك محروس.

* ثقة ما في.

* فيصل العجب ذاتو بقي يحنسو فيه.

* بله جابر بقي محل ما يمشي ..في (ركشة) بتابع فيه.

* انتوا يا المريخاب اصلو ما عاوزين تتطوروا ...الي الان بتطاردوا في اللاعبين بالركشات.

* الشفقة الدخلت في الناس ديل تاني ما بتتطلع بالساهل.

* ناس المريخ ديل من (الشفقة) الدخلت فيهم ..(صلاح الامير) بقوا يراقبوا فيها.

* فقدوا المنطق.

* التسجيلات الفاتت من (الدوشة) الحصلت عليهم ...ناس المريخ فقدوا تركيزهم ..قاموا سجلوا (ريتشارد)

* هسع ناس المريخ (وارغو) ما عارفين يتخارجوا منو كيف؟.

* لو عاوزين تودوا (وارغو) بلجيكا الا تعلموه (سباق الدراجات)..كورة ما بيلعب ليكم وارغو في (بلجيكا)

* وارغو دا مع ناس كلتشي وايداهور ما قادر يتأقلم ...عاوزينو يتأقلم ليكم في (بلجيكا)

* فرصتو في (سباق الدراجات) بتكون كبيرة.

* لكن (الكورة) ما اظن يعمر فيها.

* ما نتمناه ألا ينشغل مجلس ادارة نادي الهلال بهذه الصفقات كثيرا ويهمل جوانب اخري..لأن انهيار هذه الصفقات وارد في اية لحظة ..هذا اذا اعتبرنا ان هذه الصفقات اكتملت بصورة نهائية.

* في السودان الصفقة اذا اكتملت قبل 48 ساعة من موعد حلول التوقيع رسميا تبقي قابلة للانهيار والفشل.

* اكيد ان صلاح ادريس استفاد من تجاربه السابقة ..لكن يبقي الاعلان عن هذه الصفقات الان يشكل اكبر خطر عليها.

* لكننا في نفس الوقت لا نهمل ما قد يكون قصده صلاح ادريس بالاعلان عن هذه (الصفقات) ربما يكون يخطط لشيء اخر.

* لاحظ اننا بالامس كنا نتحدث عن (الصفقة)...واليوم نتحدث عن (الصفقات) وذلك نتيجة لتبشير صلاح ادريس لجماهير الهلال بحسمه لصفقة اخرى غير تلك التي بشر بها في حوار صحيفة قوون المفتوح.

* الملاحظة الثانية ان صلاح ادريس عرف كيف يختار منابره ليعلن عن هذه الصفقات لتتناول تصريحه هذا وسائط اعلامية مختلفة.

* وضح ان صلاح ادريس اصبحت (صفقات التسجيلات) احدي هواياته المحببة ليفاوض فيها ويحاور ...ويوضح كذلك ان الطريق الي اللاعب كلما كان صعبا كان ذلك امتع لصلاح ادريس وهذه محمدة يمكن ان نحسبها له.

* الهلال الان لا يحتاج الي عدد كبير من اللاعبين ..اذ نجد احتياجات الهلال محدودة ، مما يستوجب هذا ان يعتني الهلال كثيرا بصفقاته تلك وان ينجزها سريعا مراعيا (الكيف) في تسجيلاته تلك لا (الكم).

* صلاح ادريس دخل في تحدٍ معلن يوم اعلن امام الجميع عن صفقاته تلك ..وبشر بها ..لذا يبقي مسؤولا امام جماهير الهلال من الايفاء والالتزام بتلك الصفقات.

* ما نخشاه علي الهلال في فترة التسجيلات القادمة هو محاولة البعض لطرح اجندة الانتخابات القادمة لاتحاد الكرة وتحريك الكثير من الناس الي هذا الموضوع في هذا الوقت لينشغل صلاح ادريس ومجلسه عن التسجيلات القادمة او ليضعف مردودهم في حركة التنقلات.

* لا سيما وان الكثيرين خرجوا علينا في هذا التوقيت ليبشروا بالطرف الاخر الذي ينوي ان يترشح لمقعد رئاسة اتحاد الكرة.

* يلوح الان في الافق الدكتور معتصم جعفر ويطرح نفسه بشكل يكاد ان يكون مملا.

* وما بين صلاح ادريس ومعتصم جعفر الكثير من التنافس والتسابق الذي يبلغ حد (الخصومة)

* لا نريد من صلاح ادريس في هذا الوقت ان ينشغل بامر انتخابات اتحاد الكرة لانه مازال رئيسا لمجلس ادارة نادي الهلال وامامه الان اهم الملفات بعد ان حسم الهلال بطولة الممتاز يبقي كأس السودان والتسجيلات ملفات وجب ان يمنحها صلاح ادريس كل وقته واهتمامه.

* مطلوب من صلاح ادريس ان يوقف كل تحركاته وتصريحاته فيما يخص ترشيحه لانتخابات الاتحاد العام ..لأن الوقت هذا يحتاجه الهلال ...كما ان الحديث عن انتخابات الاتحاد العام في هذا الوقت حرق للاوراق.

* ان صلاح ادريس الان امام خيار واحد لا ثان له وهو الايفاء بصفقاته التي اعلن عنها وبشر...اذ تمدد الهلالاب بعيدا في هذه البشريات ورصفوا جسورا للاحلام.

* اوقفوا الحديث ولو مؤقتا عن انتخابات الاتحاد العام لكرة القدم في هذا الوقت وكونوا جميعا سندا لهذا الاتحاد وعضدا له حتي يكمل دورته بدلا من ان يكون (التسابق) بهذا التهافت علي مقعد رئيس اتحاد الكرة ، خاصة ان المنصب يشغله الدكتور كمال شداد الذي يفترض علينا من باب احترامه ألا نكون بهذا (التهافت) نحو كرسيه.

* المؤسف ان الذي يتحرك لهذا الكرسي الذي يشغله شداد الان هو نائبه معتصم جعفر.

* اصبروا يا جماعة الدنيا ما طارت.

* ملحوظة: عملتوها ظاهرة.

هوامش

* الفرق عشر نقاط من غير شكاوي.

* ملوة بتاعة (نقاط)

* فرق الليل من النهار.

* البشوف الشكوي يقول تحتها (فكي)

* بالمناسبة (لوزان) ما بعيدة...ممكن تمشوا ليها بعد ما تمشوا (الحصاحيصا)

* اقصد بعد ما تمشوا الي لجنة الاستئنافات.

* النيل في (لوزان) رفضوا ليهو الشكوي ضد الهلال ..انتوا يا ناس حي العرب عاوزين تقبلوا الشكوى.

* شكوى الامل اصلها لم تكن مدرجة تحت الشكاوى التي سوف يبت فيها.

* لكن يا ناس الاتحاد في داعي للجرجرة دي.

* حي العرب اتعادل مع المريخ في الملعب ...وشال النقاط عديل ...وعاوز يشيل من الهلال النقاط بالشكوى بعد ان خسر في الملعب.

* السنة دي رسوم الشكاوي ممكن تسير ميزانية الاتحاد العام لكرة القدم لمدة سنتين.

* كروت بله جابر زي كروت الشحن ..فيها رصيد.

* خبر عجيب....المريخ يفاوض اسامة الثغر.

* للمعلومية...ما عاوزنو مدرب ...عاوزنو لاعب.

* عشان لعب في الهلال ...قالوا ممكن يلعب في المريخ حتي لو اعتزل قبل 15 سنة.

* الملاعب الخضراء فقدت خضرتها...هيثم مصطفي مازال بعيدا عنها.

* سادومبا دخل خدمة تسيب المحترفين.

* بعد ان كان سادومبا الاكثر التزاما وانضابطا ...اصبح اكثرهم تغيبا.

* البركة في (ديمبا).

* براه الملتزم وواقف وثابت.

* من غير ديمبا لم ينجح احد)

* اذا عاد يوسف محمد للهلال ..يبقي الهلال حل مشكلة الطرف اليمين بصورة نهائية.

* ليت يوسف محمد يعود بدلا عن كابوندي ...مع حل مشكلة الطرف الشمال من اللاعبين الموجودين في الساحة.

* علي الاقل يوسف محمد ...مضمون وما عاوز ليه فترة عشان يتأقلم ...اضف الي ذلك ان يوسف محمد بيلعب في المنتخب النيجيري.

* عودة يوسف محمد تعني ان الهلال غير محتاج لي اي لاعب اجنبي في وجود ديمبا وامبيلي وتسجيل سادومبا بصورة نهائية.

* اذا حل الهلال مشكلة اطرافه يبقي الهلال في الموسم القادم لا ينقصه شيء.

* احتفالية صحيفة قوون بايقاد شمعتها العشرين هذا العام كانت متميزة وجميلة.

* الاحتفالات كانت متنوعة وشيقة.

* خاصة الليلة التي خصصت عن روائع نادي الطمبور.

* صديق احمد مازال يبقي علي صوته (وسيما) بكامل اناقته.

* وكان خالد الصحافة...في اقصي حالات توهجه.

* والفاتح ابراهيم وشقوري حولا تلك الليلة الي حضور من الصباح.

* اجمل ما في حفل قوون هو ان الحفل مفتوح ..حيث كان الابتهاج والاحتفال بالقراء.

* اسحاق الحلنقي ..يوجد حيثما توجد الروعة.

* خبر عاجل: كروت بله جابر (مسحوها).
قوون


تعليقات 0 | إهداء 0 | زيارات 1052






خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook

شروط التعليق

* يسمح بالتعليق لأي شخص كان شرط الجدية في الطرح

* عدم التطرق الى السب والشتائم في التعليقات لأنها ستحذف فورياً

* يجب أن لا تتعدى المشاركة حدود 500 حرف.

* يجب أن الإلتزام بالمادة المنشورة والمختار التعليق عليها تحديداً

* يهمل كل تعليق يتضمن شتائم أو تعابير خارجة عن اللياقة والأدب.

* يهمل كل تعليق يقدح بشخصيات بعينها أو هيئات.

* تهمل التعليقات المتسمة بروح الطائفية والعنصرية أو التي تمس بالذات الإلهية أو تمس المعتقدات الدينية.

* تهمل التعليقات التحريضية والتعليقات التي تتضمن تهديدات لشخص او لجهة معينة.

* تهمل التعليقات التي تتضمن ترويجا لجهات أو هيئات أو لأشخاص بعينهم.

* تهمل التعليقات التي تتعرض للكاتب وشخصه في مقالات الرأي أو التحليلات أو تقارير المراسلين.

* تهمل التعليق المتضمن ملاحظات حول إدارة التعليقات أو ملاحظات أخرى عن الموقع بعيدة عن الموضوع المختار للتعليق عليه، حيث أن مثل هذه الأمور لها بريدها الخاص

* •الموقع عربي فيرجى المشاركة فيه باللغة العربية



محمد عبدالماجد

محمد عبدالماجد

تابعنا على الفيس بوك