• ×
الجمعة 29 مارس 2024 | 03-28-2024
خلف الله ابومنذر

المرة دى معاك لآخر السكة

خلف الله ابومنذر

 6  0  1886
خلف الله ابومنذر

# عفوا ما كنت أود ولا أرغب ولا أحب أن أحبر أو أتناول ما هو بعيد عن الساحة الهلالية التى تشهد الكثير المثير الخطر هذه الايام ولكن ما حظيت به زاوية الأمس من اهتمام سرى وجرى بالتساؤلات والتعليقات والاشفاق والاستفسارات وفى مقدمتها تساؤلات الأخ الصديق الزميل عبدالله القاضى ( بالكو )عبر الواتساب دفعنى للعودة مرة أخرى لموضوع الأمس باسهاب
# حقيقة ليست هى المرة الأولى التى أجد فيها نفسى وغيرى كثر لا فى حالة صدام مع الجمصى فقد كان اصطدامى به لأول مرة ألتقيه وأتعرف عليه بصحيفة المشاهد وكنت عائدا من أمريكا وكتبت مقالا منتقدا الأخ جمال الوالى الذى أغرى لاعب بالمال ليغير اتجاهه بعد اتفاقه مع الهلال
# كتبت المادة وغادرت مبانى الصحيفة واعترف ان الانتقاد كان لاذعا ولكنه موضوعى وفى اطار العمل العام وهذا ديدنى، وتفاجأت باتصال هاتفى من الجمصى منتصف الليل ليخبرنى بان العمود لن ينشر لأنه حمل اساءات للأخ جمال الوالى وان الناشر الأخ صلاح ادريس يمنع منعا باتا انتقاد جمال فى الصحيفة ولم أرد بغير جملة خير ( صباحاتو بيض ).
# اليوم التالى توجهت لمبانى الصحيفة والتقيت فى مدخلها الأخ أسامة فرفور المدير التنفيذى للصحيفة ويشهد الله بادرنى بالسؤال( اليوم ما كتبت ليه ؟) وأجبت كتبت ولكن لم ينشر العمود وسألنى لماذا؟ أجبت لأننى انتقدت جمال الوالى وتعليمات الناشر ممنوع توجيه النقد للوالى عندها ظل الأخ فرفوريردد( الكلام ده قالو الأرباب متين ونحن ما عارفين وقالو لمنو؟) أجبت للأخ الجمصى وطلب منى مرافقته لمكتبه وأرسل فى طلب الجمصى الذى حضر وأصبح فى حالة يرثى لها عندما وجدنى بالمكتب
# بادره الأخ أسامة بالسؤال لماذا لم تشر العمود؟ ولم يجب وواصل الأخ أسامة متسائلا(متين الأرباب قال مافى زول ينتقد الوالى فى الجريدة؟) وكان رده الصمت وعندها طلب منه احضار العمود وذهب وعاد بالعمود وقرأته الأخ اسامة ثم رفع حاجبيه دهشة وقال لا أرى ما يمنع نشر العمود
# طلب الأخ فرفور التوجه لمكتب الأخ الأستاذ الشاعر أزهرى محمد على المدير العام ليفتى عسى ولعل يرى مالم نره وبالفعل طالع الأخ أزهرى المقال وقال لا أرى ما يمنع النشر من جميع النواحى ، عندها قال فرفور( العمود يتنشر وتانى ما تقول كلام بلسان الأرباب والأرباب ما قالو وما ممكن يقولو لأنو ما بحجر على رأى انسان ونحن لن نسمح له بذلك وبالله تانى ما تحرجنا وتجبرنا نتدخل فى شغل التحرير) وبهت الرجل وظل يردد ان قرار النشر من صلاحياتى كرئيس تحرير بالانابة ولم يأبه بقوله أحد
# نشر العمود ولكن قررت فى نفس اليوم ترك صحيفة المشاهد نهائيا رغم اعتذار بعض الأخوة لأننى أربا بنفسى أن أتعامل مع انسان يسرق لسان الآخرين ويكذب ولكن قبل المغادرة ذهبت اليه وألقنته درسا وأطلق ساقيه للريح بشهادة بعض الزملاء وفى وجود الأخ الزميل ياسر عبدالفتاح
غيض
# الشئ المؤسف المقرف معا ان العمود لم ينشر فى يومه وبالرغم من ذلك عندما كنت فى طريقى لمبانى الصحيفة التقيت بعدد من الزملاء الذين بادر بعضهم بسؤالى( مالك مع جمال الوالى من قولة تيت انتقدتو فى المشاهد؟)
# بعدين شوفوا الاستهبال والضعف وقلة الحيلة معا هو دخل المكتب ولقى صاحب العمود الما اتنشر قاعد ويسأل عمود شنو ؟ بكون عمود شنو يا عبقرينو فكرك؟ يعنى بكون عمود ضلع ماشى مستشفى التجانى الماحى
# بعدين رأيى بنشرو مهما كلفنى وأكتر حاجة بعملوا لى شنو؟ بوقفونى من الكتابة فترة؟ ولا حاجة لأنو وقفونى قبل كده من الكتابة مرتين ولشهور من جهاز الأمن وفى قضايا كبيرة مش زى مواضيعك الهايفة البتشغلنى بيها دى ولو كنت فى السودان ما كنت اتناولتها كتابة، كنت وصلتك فى مكانك
# شفتوا المصائب النحن فيها ؟ يعنى العمود ما اتنشر ورغم كده لقيتو عند الناس وتلقوا أخونا جمال الوالى زعل منى ساكت قبل العمود يتنشر وقبل يعرفنى زاتو وفى احتمال يكون كلموه يتصل بالأرباب عشان يوقف العمود
# تصدقوا الزول ده طلب منى أهاجم عضو استقال من مجلس الأخ الحبيب البرير وقال لى توجهات الجريدة وتعليمات الناشر الأخ الرشيد والغريبة لما جانى وساقنى وقال لى الكلام ده أخونا الزميل خالد أبوشيبة كان واقف بعيد وبضحك ولمن جيت سألتو بتضحك ليه قال لى عارف قال ليك شنو
# قلت لأبوشيبة الزول ده عجيب وبحيرك لأنو العضو المستقيل ده صحبو شديد أكتر منى أنا وبعدين حتى لو ما بعرفو أنا ما فنان فى قعدة يقولوا لى غنى لينا الأغنية دى وأغنيها وضحك أبوشيبة وقال لى عارفك بترفض.
# نعم الكثير من المواقف أقرفتنى من الزول ده وكرهتنى حاجة اسمها صحافة معاهو وهو عارف أنا بكتب رايى وقناعاتى وما حصل مرة فى صحيفة قالوا لى اكتب كده والناشر أخونا الرشيد السارق لسانو ما حصل قال لى أكتب حاجة الا حوار صحفى وعادى بكون معارض جهة وأنا مؤيد فى نفس الجريدة كما حدث فى فترة رئاسة الأخ الحبيب الأمين البرير.
# ما بقول غير أنك ما عندك علاقة بالهلال والرياضة والصحافة وماعندك علاقة بالانسانية اذا كان عايزنى أخسر ناس الهلال وأنا دخلت الهلال وعمرى14 سنة فى الأشبال وماحصل غلطت على مجتمع الهلال وكل المجالس المتعاقبة وجدت منى كل الاحترام والتقدير ووجدته منها وأنا متفق معها وأنا مختلف وماحصل مرة كتبت باسم مستعار أو حرشت زول يكتب
# برجع ليك وأصلى اتفرغت ليك وما عندنا حاجة بعد خروج الهلال.
# يا سلام أنا من الوجع والمرض والمغص شوفوا الزول ده شغلنى من أهم موضوع عندى موضوع الحفل الخيرى الكبير لدعم مشوار نادى نجمة المسالمة الأفريقى وأنا ماسك موضوع الفنانين والساوند والخيمة واللقيمات
# مشغول ومحتار مع الحفل الخيرى يعنى أعمل شنو؟ الفنانة سعاد بلكات قالت لو ما قبضت خمسمائة جنيه ما بتطلع المسرح والفنان عيسى زردية قال لو ما جابوا ليهو ركشة وضمنوا ليهو يتعشى بى كوارع ما بغنى
# بأمانة أعمل شنو ولغاية أمبارح الحارس جمال سالم زايغ ما استلم راتب شهر ديسمبر الماضى وقال ما بجى وتراورى عامل فيها مصاب وووفاق سطيف جايى الخرطوم بطيارة خاصة ولسع ما جددوا الثقة فى على جعفر


امسح للحصول على الرابط
بواسطة : خلف الله ابومنذر
 6  0
التعليقات ( 6 )
الترتيب بـ
الأحدث
الأقدم
الملائم
  • #1
    عزالدين سيد وديدي 04-04-2016 02:0
    الحمد لله الذي شغلك وتكون دايما مشغول لمن تنسى شي اسمو المريخ
  • #2
    ايدام 04-04-2016 11:0
    قالوا وقلنا الله يهديكم اتركوا هذه الصغائر و قوموا الى هلالكم الله يرحمكم
  • #3
    M.HUSSEIN 04-04-2016 11:0
    أخينا ابو منذر لك التحية والله لم اتضايق من مداعباتك لنا فى اخر عمودك لكن استهتارك باسم اكبر نادى فى السودان دى بتزعل ولو انا فى السودان كنت جيتك بنفسى زى جيتك للجمصى .لذلك حتى يكون بيننا احترام من الافضل ان تكتب (المريخ) لأنه الهلال من ضلع المريخ الاعوج فلم أسمع بأن امنا حواء تطاولت على ابونا ادم .
  • #4
    Abuhala 04-04-2016 10:0
    لله درك اخي خلف الله
    الهلال ومصائبه اولي بكلماتكم
    تساموا فوق ما اصابكم فالهلال احوج
    ما يكون
    ابو حلا
  • #5
    العقرب 04-04-2016 08:0
    التحية لك أبو منذر وأنت تدافع عن قناعاتك .. أنا مريخابي ويعجبني مداعباتك للمريخاب في آخر عمودك ... مداعبات ليس فيها إساءة أو تحقير وإنما هي قفشات جميلة .. تزكي روح المناكفة بين الغريمين فلك التحية.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019